Nagpatupad ng checkpoint ang Municipal Agriculture Office (MAO)–Odiongan mula noong Nobyembre 25, katuwang ang Barangay Council ng Barangay Anahao, sa kahabaan ng national road sa Sitio Bating, malapit sa Municipal Slaughter House at sa boundary ng bayan ng Ferrol.
Layon ng hakbang na ito na mapigilan ang posibleng pagpasok ng African Swine Fever (ASF) sa municipal slaughterhouse, matapos makumpirma na ASF ang naging sanhi ng pagkakasakit at pagkamatay ng maraming baboy kamakailan sa bayan ng Romblon, Romblon.
Pinangunahan ang operasyon ng Barangay Captain at mga opisyal ng Barangay Anahao, kasama ang mga tauhan ng MAO–Odiongan.
Ayon kay Kagawad Leony Fadero, Committee Chair on Agriculture, mahigpit nilang ipinatutupad ang mga alituntunin para sa mga magpapasok ng baboy sa slaughterhouse.
“Sa lahat po na papasok sa slaughter, kailangan po ng Barangay Certification mula sa origin o pinagmulan ng baboy. Bawal na rin po ang pagpasok ng baboy mula sa ibang bayan,” pahayag ni Fadero.
Kahapon ay nagsagawa rin ng pagpupulong ang lokal na pamahalaan ng Odiongan kasama ang mga concerned agencies upang talakayin ang mga kinakailangang hakbang para hindi makapasok sa bayan ang ASF.
Isa sa mga napagkasunduang aksyon ay ang pagtatayo ng mga checkpoint sa iba pang boundary areas ng Odiongan, kabilang ang Barangay Malilico, Barangay Anahao, Barangay Canduyong, at Barangay Panique.
Ang African Swine Fever (ASF) ay isang nakahahawang sakit na lubhang mapanganib sa industriya ng pagbababuyan dahil mabilis itong kumalat at mataas ang mortality rate sa mga apektadong alagang baboy.
