Tiniyak ng Malakanyang na hindi papayagan ni Pangulong Ferdinand Marcos Jr. na mapasok sa 2026 national budget ang mga kwestyunableng proyekto.
Ito ay bilang tugon sa mga ibinahaging pahayag nina House Deputy Speaker Ronaldo Puno at Marikina Representative Marcy Teodoro na nakakita sila ng ilang proyekto na maaaring may anomalya sa ilalim ng 2026 National Expenditure Program (NEP).
Partikular na binanggit ni Rep. Puno ang mga priority projects mula sa kaniyang distrito na nawala sa NEP. Samantala, si Rep. Teodoro ay nagbanggit naman na may mga proyektong naidoble o nakumpleto na ngunit muling nakuhang pondo sa ilalim ng 2026 NEP.
Ayon kay Palace Press Officer Usec. Claire Castro, hindi dapat agad husgahan ang isyu. Hinikayat niya ang mga mambabatas na makipag-ugnayan muna sa Department of Public Works and Highways (DPWH) upang alamin ang mga detalye ng naturang proyekto at tiyaking walang anomalya. Mariing binigyang-diin ni Castro na kung mapapatunayang may nasingit na proyekto sa budget, hindi ito papayagan ng Pangulo.
Ipinaliwanag ni Castro na nais ng Pangulo na panatilihin ang integridad ng budget at mapanatili ang serbisyo publiko. Aniya, galit na ang Pangulo sa isyu dahil ang pondo ay para sa benepisyo ng mamamayan. Upang masiguro ang transparency at accountability, pinayuhan niya ang mga mambabatas na maghain ng ebidensya kung sakaling may mapatunayan na insertion o anomalya sa budget.
Muling sinabi ni Castro na mag-iimbestiga ang isang independent commission sa umano'y mga insertions sa 2026 NEP. Kasalukuyan nang binubuo ang komisyon upang magpatupad ng imbestigasyon. Ang hakbang na ito ay bahagi ng pagsusumikap na masiguro ang pagiging patas at tama sa paglalagak ng pondo para sa bansa.
