Nilinaw ng Land Transportation Office (LTO) Romblon District Office na walang direktang kinalaman ang kanilang tanggapan sa kasalukuyang mahabang pila sa Private Emission Testing Center sa probinsya.
Sa inilabas na pahayag, sinabi ng LTO Romblon na ang pagbubukas, pagsasara, o pagsuspinde ng smoke testing centers ay nasa ilalim ng kapangyarihan ng Department of Transportation (DOTr) at hindi ng LTO.
Ipinaliwanag ng ahensya na simula Agosto 1, ay pansamantalang isinailalim sa 90-araw na suspensyon ng DOTr ang Alicor Emission Testing Center dahil umano sa ilang paglabag. Dahil dito, sa isang testing center lamang dumidiretso ang mga kliyente, dahilan ng pagdagsa ng pila.
Dagdag pa ng LTO Romblon, ipinatutupad ng Jazper Emission Testing Center ang “first come, first served listing system” kung saan binibigyan ng numero at tiyak na petsa ng pagbabalik ang mga kliyente upang maiwasan ang pabalik-balik.
Hinihikayat din ng tanggapan ang publiko na maging maingat sa pagbibigay ng akusasyon at iginiit na hindi kagustuhan ng LTO Romblon o ng testing center ang kasalukuyang sitwasyon.
