Nakatakdang idaos ng Department of Trade and Industry (DTI) at Small Business Corporation (SBCorp) ang 2025 DTI-SBCorp Regional Roadshow and Loan Application Fair sa dalawang munisipalidad ng Romblon ngayong Setyembre para sa mga lokal na negosyante.
Ayon sa anunsyo, gaganapin ang unang loan application fair sa DOBS Events Place, Odiongan sa darating na Setyembre 23, Martes, alas-10 ng umaga, habang ang mga negosyante naman sa bayan ng Romblon ay maaaring dumalo sa PGR Multi-Purpose Hall, Capaclan, Romblon, Romblon sa Setyembre 25, Huwebes, alas-10 ng umaga.
Layunin ng aktibidad na tulungan ang mga micro, small, and medium enterprises (MSMEs) sa probinsya na magkaroon ng karagdagang kapital para mapalago ang kanilang mga negosyo.
Para sa mga uutang ng higit sa ₱100,000, kinakailangang dalhin ang 2024 at 2025 Mayor’s Permit o Barangay Micro Business Enterprise (BMBE) Certificate. Para naman sa mga mag-aapply ng mas mababa sa ₱100,000, kailangan ang Barangay Certification o Barangay Business Permit.
Dapat ding magpakita ng original o certified copy, o malinaw na digital photo ng mga nasabing permit. Kasama rin sa requirements ang malinaw na larawan ng business signage, inventories, at business assets, government-issued ID, proof of bank account, at corporate documents kung para sa korporasyon o partnership.
Tampok sa naturang loan fair ang same-day loan approval, kung saan inaasahang mahigit 80 negosyong Romblomanon ang agad maaaprubahan ng kanilang loan applications.
Hinikayat ng DTI-SBCorp ang lahat ng MSMEs sa Romblon na dumalo sa nasabing aktibidad upang makuha ang tulong pinansyal na handog ng pamahalaan para sa pagpapaunlad ng kanilang kabuhayan.
