Ibinunyag ng Bureau of Customs (BOC) na walo sa 12 luxury cars na pagmamay-ari umano ng contractors na mag-asawang sina Sarah at Pacifico Discaya ay walang entry records sa bansa.
Binigyan ng BOC ang mag-asawa ng sampung araw para magsumite ng mga dokumento na magpapatunay na nabayaran ng tama ang kaukulang buwis at dues ng kanilang mga sasakyan.
Ayon kay Customs Commissioner Ariel Nepomuceno, layunin ng kanilang ahensya na tiyakin na ang mga inisyal na resulta ng imbestigasyon ay may sapat na basehan at kayang panindigan sa korte.
Kasabay nito, inihayag ng BOC na plano rin nilang humiling ng search warrants para sa iba pang luxury cars ng Discayas, na ayon kay Sarah ay nasa 28 ang kabuuang bilang.
Gayunpaman, ibinunyag naman ni Senate Pro Tempore Jinggoy Estrada na base sa record ng Land Transportation Office (LTO), mayroong 40 high-end vehicles na nakapangalan sa mag-asawang Discaya.
