Wagi ng gintong medalya ang 19-anyos na Filipina triathlete na si Kira Ellis sa katatapos na 2025 Triathlon Junior Women’s Cup na ginanap sa Riga, Latvia noong Agosto 16, 2025. Nilahukan ang torneo ng 15 iba pang junior triathletes mula sa iba’t ibang panig ng mundo.
Natapos ni Ellis ang karera sa kabuuang oras na 1:05:07, kung saan nagtala siya ng 12:04 sa swimming leg, 34:27 sa biking leg, at 17:36 sa running leg. Pumangalawa si Luca Vanderbruggen ng Belgium na nagtala ng kabuuang oras na 1:05:17, habang ikatlo naman si Sarah Walters ng Germany sa oras na 1:05:22.
Binubuo ang kompetisyon ng 750-m swimming, 22-km biking (4 laps), at 5.1-km running (2 laps).
Hindi na bago kay Ellis ang magbigay ng karangalan sa bansa. Noong 2023, kinatawan niya ang Pilipinas sa Southeast Asian (SEA) Games sa Cambodia, kung saan kabilang siya sa Aquathlon Mixed Team Relay Team na nagwagi ng gintong medalya kasama sina Matthew Hermosa, Erica Burgos, at Iñaki Lorbes.
