Pinaalalahanan ni Dennis Alag, General Manager ng Tablas Island Electric Cooperative Inc. (TIELCO), ang publiko na makipagtulungan sa kanilang mga clearing teams tuwing nagsasagawa ng operasyon sa mga linya ng kuryente.
Ayon kay Alag, mahalaga ang regular na paglilinis at pagputol ng mga sanga ng puno na nakakasabit o nakalapit sa mga power lines upang maiwasan ang biglaang brownout at masiguro ang tuloy-tuloy na suplay ng kuryente sa Tablas Island.
“Malaking bagay po ang clearing operations para mapanatiling ligtas at maayos ang ating power distribution system. Kapag may nakaharang na puno o sanga, maaari itong magdulot ng short circuit, pagkasira ng linya, o hindi inaasahang pagkawala ng kuryente,” paliwanag ni Alag.
Binigyang-diin din niya na hindi lamang power interruptions ang maaaring idulot ng mga nakasabit na puno sa linya ng kuryente kundi maging panganib sa kaligtasan ng publiko, dahil maaari itong pagmulan aksidente.
Batay sa Republic Act 11361 o Anti-Obstruction of Power Lines Act, ipinagbabawal ang pagtatayo ng anumang istruktura, pagtatanim ng puno, o pagkakaroon ng anumang sagabal na maaaring makasagabal sa operasyon, maintenance, at expansion ng mga power lines.
Nilinaw din sa batas na may karapatan ang mga power utilities, gaya ng TIELCO, na magsagawa ng clearing operations sa right-of-way ng kanilang mga linya nang hindi kinakailangang makipag-ayos pa sa mga may-ari ng lupa, basta’t ito ay para sa kaligtasan at maayos na serbisyo ng kuryente.
Kaugnay nito, muling nanawagan si Alag sa mga residente at mga barangay officials na maging katuwang ng TIELCO sa pagpapatupad ng mga clearing activities.
