Pinuri ni House Speaker Ferdinand Martin G. Romualdez ang pilot implementation ng unified identification system para sa mga persons with disabilities (PWDs) na ipinakilala ng pamahalaan.
Ayon sa kanya, ito ay isang mahalagang hakbang patungo sa pagtataas ng dignidad, katarungan, at mas maayos na serbisyo para sa isang mahina at bulnerableng sektor ng lipunan.
Ayon sa Department of Social Welfare and Development (DSWD), nagsimula na ang pilot rollout sa 35 na lugar sa buong bansa, kabilang ang bayan ng San Miguel sa lalawigan ng Bulacan.
Sa ilalim ng nasabing programa, ang mga lokal na pamahalaan ang tatanggap ng aplikasyon, magsusuri at mag-aapruba ng mga PWD ID sa pamamagitan ng kanilang Persons with Disability Affairs Offices.
Sa kabilang banda, ang National Council on Disability Affairs (NCDA) ang mangangasiwa sa centralized na proseso ng printing ng mga ID.
Layunin ng bagong sistema na ganap na mapatigil ang paggamit ng pekeng PWD ID, na nagreresulta sa pagkalugi ng mga negosyo at nagdudulot ng kawalang-katiyakan sa identidad ng mga lehitimong PWDs.
Tinatayang higit sa 200,000 PWDs ang makikinabang sa pilot rollout, at kapag naging matagumpay, inaasahang ito ay makatutulong sa mahigit dalawang milyong PWDs sa buong bansa.
Bukod sa Bulacan, ilulunsad din ang programa sa Pasay City, Muntinlupa City, at Santa Rosa City sa Laguna sa linggong ito. Kasama rin sa 35 pilot LGUs ang mga lugar sa Bangsamoro Autonomous Region in Muslim Mindanao, Pangasinan, Nueva Vizcaya, Rizal, Cavite, Camarines Norte, Aklan, Bohol, Bukidnon, at South Cotabato.
Sa ilalim ng bagong sistema, ang publiko, negosyo, at lokal na pamahalaan ay inaasahang makikiisa upang mapanatili ang integridad ng sistema at maiwasan ang pang-aabuso.
Nagpahayag si Romualdez ng pagtutulak sa Kongreso para sa mga panukalang batas na mas lalong magpapabuti sa kapakanan ng PWDs.
