Panibagong karangalan ang naidagdag ng Romblon United FC matapos silang magkampeon sa katatapos lamang na 1st Villa Sabina Futsal Tournament noong July 27, 2025. Ginanap ang torneo sa Sabina Covered Court, Carreon Park, Novaliches, Quezon City, at nilahukan ito ng iba’t ibang koponan mula sa iba’t ibang rehiyon gaya ng Tamaraw FC mula Oriental Mindoro, VZL Assassins FC mula Valenzuela, Dragon Kickers FC mula Olongapo, World Citi College FC mula Anonas, Quezon City, at San Pedro FC mula Laguna.
Isinagawa ang torneo gamit ang round-robin format kung saan lahat ng anim na koponan ay naglaban-laban. Sa pagtatapos ng round robin, nagtala ng 4 wins at 1 loss ang Romblon United FC, sapat upang masungkit ang No. 1 seed pagpasok sa knockout stage. Sa semifinals, tinambakan nila ang Tamaraw FC sa iskor na 3–2. Sa finals naman, nakaharap nila ang Dragon Kickers FC at tinalo ito sa isang dikit na laban, 4–3, upang tuluyang masungkit ang kampeonato.
Ang Romblon United FC ay binubuo ng mga piling manlalaro mula sa iba’t ibang bayan sa probinsya ng Romblon. Kasama sa roster sina Ronel Oyao, Jo Nino Mallen, Reymark Roz, Amir Soldevilla, Jerrick Libre, Jervince Manliquid, Edgar Tumanon II, Jam Mariveles, Timoy Polaron, at Gerard Etid.
Sa pagkapanalong ito, muling napatunayan ng Romblon United FC ang kanilang husay at dedikasyon sa larangan ng football. Isa na namang tagumpay ang kanilang naidagdag sa lumalawak na koleksyon ng tropeo ng probinsya ng Romblon. Sa bawat torneo, patuloy nilang pinatutunayan na ang Romblon ay isang makapangyarihang puwersa sa futsal scene ng bansa.
Bukod sa kampeonato, naiuwi rin ng koponan ang ilang mga individual awards. Si Timoy Polaron ay itinanghal na Best Goalkeeper, si Jervince Manliquid bilang Best Defender, at si Jam Mariveles naman ang kinilalang Top Scorer of the Tournament.
