Nagwagi si 69-anyos na Evelyn Manzala–Lindo, tubong Romblon, sa World Overseas Filipino Bowling Tour 2025 na ginanap mula July 20–26, 2025 sa Dubai International Bowling Center sa Dubai, UAE.
Nakuha niya ang Gold Medal sa Singles Cup at Bronze Medal sa Team Event. Noong nakaraang taon, nanalo rin siya sa parehong torneo na ginanap sa Japan.
Ang World Overseas Filipino Bowling Tour ay isang taunang paligsahan na bukas sa mga Pilipinong naninirahan o nagtatrabaho sa iba't ibang bansa. Ang torneo ay kinikilala ng Philippine Sports Commission (PSC) at ngayong taon ay ginanap ang ika-10 edisyon nito simula noong 2015.
Kabilang sa mga lumahok ang All Filipino Tenpin Club mula Doha, Qatar; Dubai Filipino Bowling Club, na siyang host ngayong taon; at ang Philippine Bowling Club (PBC), na kinabibilangan ni Evelyn at nakabase sa Estados Unidos.
Bukod sa kanyang partisipasyon sa bowling, si Evelyn ay dating OR nurse na nagtrabaho sa loob ng halos 30 taon. Sa kasalukuyan ay nakabase siya sa Hollis, Queens, New York kasama ang kanyang pamilya.
Sa Libertad, Odiongan, Romblon—ang kanyang lugar na pinanggalingan—nagsagawa na siya ng medical mission kasama ang grupo ng mga nurse at doktor.
