Taos-pusong tumugon si PNP Chief Gen. Nicolas Torre III sa mga pamilyang nasalanta ng nakaraang kalamidad sa Occidental Mindoro sa pamamagitan ng pamimigay ng relief goods noong Agosto 3.
Aabot sa 1,000 pamilya, kasama ang 75 pulis, ang nakatanggap ng mga tulong mula sa Philippine National Police (PNP).
Ayon kay PNP Spokesperson Brig. Gen. Jean Fajardo, ang mga relief ay pinondohan mula sa pondo na nakuha sa ticket sales at donasyon sa isang charity boxing exhibition na pinangungunahan ni Gen. Torre sa Maynila.
Hindi lamang mga sibilyan ang nabigyan ng tulong, kundi pati ang kapwa kapulisan. Bawat isa sa 75 na police personnel mula sa Mamburao Municipal Police Station ang tumanggap ng karagdagang ₱7,000 na pinansyal na ayuda.
“Narito ako hindi lang bilang Hepe ng Pambansang Pulisya, kundi bilang kapwa Pilipino na nakikiisa sa inyong paghihirap at sa inyong determinasyon na muling bumangon,” pahayag ni Torre.
Dagdag pa ni Fajardo, bukod sa Occidental Mindoro, balak ng PNP na dalhin ang ganitong uri ng tulong sa iba pang lugar na labis na naapektuhan ng mga kalamidad tulad ng bagyong Crising, Dante, Emong, at ang southwest monsoon o habagat sa mga rehiyon 1 at 3.
Ang relief effort na ito ni Gen. Torre ay bahagi ng kilusang “Kalinga sa Pulis”, isang inisyatiba na naglalayong alagaan ang kapakanan ng mga pulis at kanilang pamilya, lalo na sa oras ng sakuna.
