Nilagdaan ni Pangulong Ferdinand R. Marcos Jr. ngayong Miyerkules ang Republic Act No. 12232 na nagpapaliban sa Barangay at Sangguniang Kabataan Elections (BSKE) mula Disyembre 2025 patungong Nobyembre 2026, at nagtatakda ng apat na taong termino para sa mga opisyal ng barangay at SK.
Sa ilalim ng bagong batas, hindi maaaring magsilbi nang higit sa tatlong magkasunod na termino ang isang opisyal ng barangay sa parehong posisyon, habang ang mga opisyal ng SK ay papayagan lamang ng isang termino.
Itatakda ang susunod na BSKE tuwing unang Lunes ng Nobyembre 2026 at kada apat na taon pagkatapos nito. Ang mga mananalong kandidato ay manunungkulan simula Disyembre 1 kasunod ng halalan.
Mananatili sa puwesto ang mga kasalukuyang opisyal sa “hold-over capacity” maliban na lamang kung sila ay matatanggal o masususpinde. Gayunpaman, ang mga nasa ikatlong magkasunod na termino ay hindi na maaaring tumakbo muli sa 2026.
Inaatasan ang Commission on Elections (Comelec) na maglabas ng implementing rules sa loob ng 90 araw mula sa bisa ng batas.
Matatandaang sinabi ni Marcos na suportado niya ang pagpapaliban ng barangay elections upang mabigyang-prayoridad ng pamahalaan ang kauna-unahang parliamentary elections sa Bangsamoro region.
Huling ginanap ang BSKE noong Oktubre 30, 2023.
