Nagpapatuloy ang knockout winning streak at undefeated record ng 25-anyos na middleweight contender na si Weljohn “Triggerman” Mindoro matapos magwagi sa pamamagitan ng 3rd round TKO laban kay Dormedes Potes ng Colombia sa kanilang laban na ginanap sa Plant City, Florida, USA noong Agosto 15, 2025.
Sa unang round pa lamang, kontrolado na ni Mindoro ang bilis at takbo ng laban. Paulit-ulit niyang tinamaan si Potes ng malalakas na suntok sa katawan na nagresulta sa pagbagsak ng kalaban. Sa ikalawang round, nagpatuloy si Mindoro sa parehong game plan at muling bumagsak ng dalawang beses si Potes. Pagsapit ng ikatlong round, nakipagsabayan si Potes sa matitinding palitan ng suntok, ngunit mas malakas at mas epektibo pa rin ang mga tira ni Mindoro, dahilan para muling bumagsak ang Colombian fighter.
Bagama’t natapos ni Potes ang ikatlong round, sa pagsisimula ng ikaapat na round ay tumanggi na siyang lumaban. Dahil dito, idineklara ang panalo para kay Mindoro, na tubong Tumingad, Zamboanga del Sur.
Sa panalong ito, umangat ang record ni Mindoro sa 15 panalo, 15 knockouts at 1 draw. Nais ngayon ni Mindoro na makaharap ang mas matitinding katunggali sa middleweight division at matupad ang kanyang target na world title fight.
Kabilang sa mga kilalang boksingerong maaari niyang makaharap sa super welterweight at middleweight division ay sina Canelo Alvarez, Terrence Crawford, Chris Eubank Jr., Vergil Ortiz, Janibek Alimkhanuly, Carlos Adames, Erislandy Lara, Conor Benn, Xander Zayas, Tim Tszyu, Troy Isley, Sebastian Fundora at Bakhram Murtazaliev.
