Nag-uwi ng tatlong gintong medalya si Women’s FIDE Master (WFM) Jemaicah Yap Mendoza, tubong Sta. Maria, Romblon, sa katatapos na 9th Eastern Asia Youth Chess Championship 2025 na ginanap sa Zhuhai, China mula July 20–30, 2025.
Nakamit ni Mendoza ang gold medals sa Girls Under-14 Standard Event at Blitz Event. Kasama rin siya sa Under-16 Team ng Pilipinas na nagwagi ng isa pang gold medal sa team competition.
Sa kabuuan, nagtapos ang Pilipinas sa ikalawang puwesto sa medal standings ng nasabing 10-day tournament. Kabilang sa mga bansang lumahok ay Japan, Hong Kong, India, Korea, Macau, Singapore, Malaysia, Vietnam, Mongolia, Thailand, Taipei, Myanmar, at China bilang host country.
Kasama ni Mendoza sa Under-16 Team sina Kaye Lalaine Regidor at Elle Castronuevo. Nagwagi rin ng gold si Christian Gian Karlo Arca sa Under-18 Open Category Standard Event, at si Ivan Travis Cu sa Blitz Event ng parehong kategorya. Nakuha rin ng Pilipinas ang gold sa Under-18 Blitz Team Event sa pamamagitan nina Arca, Cu, at Mark Gabriel Usman.
Bukod sa anim na gold medal, nadagdagan pa ang medal tally ng Pilipinas ng tatlong bronze medal mula kina Christian Gian Karlo Arca at Ivan Travis Cu.
