Pinaboran ng Commission on Human Rights (CHR) ang plano ng Department of Transportation (DOTr) na isapubliko ang mga pangalan ng mga lumalabag sa batas trapiko. Ayon kay CHR Chair Atty. Beda Epres, basta susunod sa tamang proseso ang DOTr upang hindi ito maituring na paglabag sa karapatang pantao.
Ipinaliwanag ni Epres na kabilang sa mga dapat isaalang-alang sa proseso ay kung napatawan ng kaparusahan ang mga salarin at kung pinagdaanan nila ang malalimang imbestigasyon.
Sa ganitong paraan, hindi ito maituturing na paglabag sa kanilang mga karapatang pantao. Subalit, kung basta na lamang papahiyain ang mga motorista nang walang nararapat na imbestigasyon, maituturing itong paglabag sa kanilang mga karapatang pantao.
Inihayag din ng CHR ang payo sa DOTr na iwasan ang “trial by publicity” o pagsisiwalat ng pangalan ng mga lumalabag nang hindi pa natitiyak ang kanilang sisi. Tanging ang mga driver na mapapatunayang lalabag ang nararapat lamang na ilathala ang kanilang mga pangalan.
Nauna nang iniulat ang plano ni Transportation Secretary Vince Dizon na magsagawa ng “shame campaign” laban sa mga traffic violators na makailang beses nang nahuli. Layunin nitong hikayatin ang mga motorista na maging mas responsable at sumunod sa batas trapiko.
