Nasungkit ni Carlo Biado, 41 taong gulang na tubong Rosario, La Union, ang kampeonato sa World Pool 9-Ball Championship 2025 matapos talunin si defending champion Fedor Gorst ng USA sa iskor na 15–13.
Ang torneo ay ginanap mula Hulyo 21–26, 2025 sa Green Halls, Jeddah, Saudi Arabia, at nilahukan ng 128 manlalaro mula sa iba’t ibang bansa.
Sa championship match (race to 15), maagang nagkaroon ng 9–2 na kalamangan si Biado laban kay Gorst. Nakabawi naman si Gorst at naitabla ang iskor sa 9–9. Sumunod dito, nakapuntos ng apat na sunod si Biado para muling manguna sa iskor na 13–9. Muling nakahabol si Gorst at naitabla sa 13–13. Sa sumunod na rack, walang naipasok na bola si Gorst sa kanyang break, na nagbigay daan kay Biado upang makuha ang huling dalawang racks at tapusin ang laban.
Sa tagumpay na ito, naging kauna-unahang Pilipino si Biado na nagwagi ng dalawang beses sa World Pool Championship. Una niya itong napanalunan noong 2017.
Bago marating ang finals, tinalo ni Biado si Chris Melling ng United Kingdom sa iskor na 11–9 (Last 64), si Wiktor Zielinski ng Poland 11–8 (Last 32), at si Jeffrey Ignacio ng Pilipinas 11–9 (Last 16). Sa quarterfinals, tinalo niya si Ko Ping Chung ng Chinese Taipei 11–7, at sa semifinals ay nanalo siya kontra kapwa Pilipino na si Bernie Regalario 11–3.
Bukod kay Biado, ilan pang Pilipinong nagwagi sa World Pool 9-Ball Championship ay sina Efren “Bata” Reyes (1999), Ronnie Alcano (2006), at Francisco “Django” Bustamante (2010). Noong 2004, nagkampeon din si Alex “The Lion” Pagulayan habang kinakatawan ang Canada. Sa mga sumunod niyang torneo, ang Pilipinas na ang kanyang opisyal na bansa sa kompetisyon.
