Pasok na ang Philippine Women’s National Football Team, kilala bilang Filipinas, sa 2026 AFC Women’s Asian Cup matapos masweep ang tatlong laro sa Group G ng qualifying tournament. Tinalo ng Filipinas ang Saudi Arabia (3–0), Cambodia (6–0), at Hong Kong (1–0).
Dahil sa tatlong sunod na panalo, sigurado na ang kanilang puwesto sa Asian Cup na gaganapin sa Australia mula March 1–21, 2026. Kasama nila ang mga bansang naunang nag-qualify: Australia (host), China, South Korea, Japan, Bangladesh, Vietnam, India, Chinese Taipei, North Korea at Uzbekistan. Isa na lang ang natitirang slot na pinaglalabanan ng Jordan, Bhutan, Iran, Singapore at Lebanon.
Noong 2022, nakapasok ang Filipinas hanggang semifinals ng AFC Women’s Asian Cup. Ang resulta ay nagbigay sa kanila ng pagkakataon na makalaro sa 2023 Women’s World Cup, isang makasaysayang unang beses para sa bansa.
Kabilang sa line-up ng Filipinas para sa qualifying tournament ang mga Goalkeepers na sina Olivia McDaniel, Inna Palacios, Nina Meollo, at Gabriel Baker; Defenders na sina Janae DeFacio, Jessika Cowart, Hali Long, Katana Norman, Angela Beard, Sofia Harrison Wunsch, Rhea Chan, at Malea Cesar; Midfielders na sina Ava Villapando, Jaclyn Sawicki, Sara Eggesvik, Charisa Lemoran, Isabella Pasion, Quinley Quezada, Alexa Pino, at Kaya Hawkinson; at Forwards na sina Carleigh Frilles, Chandler McDaniel, Dionesa Tolentin, Meryll Serrano, Nina Mathelus, at Chayse Ying.
