Nagkaisa ang ilang ahensya ng pamahalaan sa pagbibigay ng serbisyo at suporta sa mga Micro, Small, and Medium Enterprises (MSMEs) sa lalawigan ng Romblon sa pamamagitan ng isang aktibidad na bahagi ng National MSME Week 2025.
Idinaos ang programa sa bayan ng Odiongan, kung saan nagtayo ng mga service desk ang mga ahensyang tulad ng Department of Labor and Employment (DOLE), Department of Science and Technology (DOST), Department of Social Welfare and Development (DSWD), Technical Education and Skills Development Authority (TESDA), Provincial Training Center (PTC), Department of Information and Communications Technology (DICT), Land Bank of the Philippines (LandBank), Small Business Corporation, at Intellectual Property Satellite Office–MIMAROPA.
Tumanggap ang mga ito ng mga katanungan, aplikasyon, at request mula sa mga MSME participants.
Pinangunahan ng Department of Trade and Industry (DTI) Romblon ang aktibidad, at nag-alok ito ng libreng business counseling sa pamamagitan ng mga programa nito tulad ng One Town One Product (OTOP), Negosyo Center, at suporta sa mga benepisyaryo ng Comprehensive Agrarian Reform Program (CARP).
Ayon kay DTI Romblon Provincial Director Orville Mallorca, bahagi ito ng serye ng MSME Summit na isinasagawa sa iba’t ibang probinsya ng rehiyon ng MIMAROPA upang palakasin ang kakayahan ng maliliit na negosyo at ipaalam ang mga serbisyong handog ng pamahalaan para sa kanila.
Bukod sa mga booth at one-on-one consultations, isinagawa rin ang isang forum kung saan tinalakay ang mga mahahalagang paksa na makatutulong sa modernisasyon at pagpapalago ng negosyo.
Kabilang sa mga paksang ito ang Digital Financial Literacy, Digital Marketing, paggamit ng Point-of-Sale (POS) systems, Cybersecurity, Franchising, Intellectual Property Rights, at Loan Financing options.
Ang aktibidad ay dinaluhan ng aabot sa mahigit 200 na negosyante mula sa iba't ibang bayan ng Romblon.
