Kampyon sina Jannik Sinner ng Italy at Iga Swiatek ng Poland sa katatapos na Wimbledon Tennis Tournament 2025 na ginanap mula June 30 hanggang July 13 sa All England Lawn Tennis and Croquet Club sa London, UK.
Ang Wimbledon ay ang ikatlong Grand Slam event ng taon at kilala sa Grass Court surface.
Sa Men's Division, tinalo ni Sinner si Carlos Alcaraz ng Spain sa finals sa iskor na 4–6, 6–4, 6–4, 6–4. Ito ang unang Wimbledon title ni Sinner at pang-apat na Grand Slam crown sa kanyang career. Muling nagharap sina Sinner at Alcaraz matapos ang kanilang laban sa French Open kung saan nanalo si Alcaraz. Sa pagkakataong ito, ipinakita ni Sinner ang mas matatag na depensa at walang sinayang na service game.
Bago ang finals, tinalo ni Sinner sina Luca Nardi (1st round), Aleksandar Vukic (2nd round), Pedro Martinez (3rd round), Grigor Dimitrov (4th round, retirado dahil sa injury), Ben Shelton (quarterfinals), at Novak Djokovic (semifinals).
Sa Women's Division, wagi si Iga Swiatek sa pamamagitan ng isang dominanteng 6–0, 6–0 na panalo laban kay Amanda Anisimova ng USA. Ito ang unang 6–0, 6–0 scoreline sa Wimbledon women’s finals sa loob ng 104 taon.
Bago ang finals, tinalo ni Swiatek sina Polina Kudermetova, Catherine McNally, Danielle Collins, Clara Tauson, Liudmila Samsonova, at Belinda Bencic.
Sa Men's Doubles, wagi ang British pair na sina Julian Cash at Lloyd Glasspool kontra kina Rinky Hijikata ng Australia at David Pel ng Netherlands, 6–2, 7–6. Sa Women’s Doubles naman, nagkampeon sina Veronika Kudermetova ng Russia at Elise Mertens ng Belgium matapos talunin sina Su-Wei Hsieh ng Chinese Taipei at Jelena Ostapenko ng Latvia, 3–6, 6–2, 6–4.
