Hinihikayat ng Regional Statistics Committee (RSC) MIMAROPA ang mga ahensiya ng pamahalaan sa rehiyon na gumamit ng standard na sistema sa pagkalap at pagsasaayos ng datos upang mapabuti ang serbisyong pampubliko at paggawa ng desisyon.
Pinangungunahan ng Philippine Statistics Authority (PSA) at Department of Economy, Planning, and Development (DepDev), binigyang-diin ng komite ang kahalagahan ng paggamit ng mga Philippine Statistical Classification Systems sa kanilang ikalawang quarterly meeting na isinagawa noong Mayo 19.
Ang mga sistemang ito ay tumutulong upang maisaayos ang datos sa isang pare-parehong paraan.
Ang Philippine Standard Industrial Classification (PSIC) ay ginagamit upang pangkatin ang mga uri ng negosyo. Malaki ang maitutulong nito sa mga lokal na pamahalaan upang matukoy kung aling mga industriya ang lumalago, tulad ng turismo o agrikultura.
Ang Philippine Standard Occupational Classification (PSOC) naman ay nag-uuri ng iba’t ibang uri ng trabaho. Nakakatulong ito upang malaman kung anong mga trabaho ang may mataas na demand, tulad ng guro, drayber, o manggagawa sa konstruksiyon.
Ginagamit naman ang Philippine Standard Commodity Classification (PSCC) upang ayusin ang mga produkto. Makakatulong ito sa pagpaplano ng pamilihan at mga aktibidad ng kalakalan sa pamamagitan ng pagtukoy kung aling mga produkto ang madalas na binibili o ibinebenta, gaya ng bigas, isda, o damit.
Samantala, ang Philippine Standard Geographic Code (PSGC) ay nagbibigay ng code sa bawat lalawigan, bayan, o barangay. Ito ay nakatutulong upang matukoy kung saan higit na kinakailangan ang mga programa o serbisyong pampubliko.
Ayon kay DepDev MIMAROPA Regional Director Agustin Mendoza, na kasalukuyang Chairperson ng RSC, ang paggamit ng mga sistemang ito ay nagpapadali sa pag-unawa at paghahambing ng datos mula sa iba't ibang ahensya.
“Kapag iisa ang batayan ng lahat ng ahensya, mas madaling matukoy ang mga trend at makagawa ng mga programang tunay na tumutugon sa pangangailangan ng mamamayan,” ani Mendoza.
Dagdag pa niya, ang pagkakaroon ng iisang format sa datos ay nagpapadali sa ugnayan ng mga opisina at nagpapahusay sa kawastuhan ng pagpaplano.
Suportado rin ng PSA MIMAROPA ang inisyatibo, at sinabing ang paggamit ng mga sistemang ito ay nakatutulong upang iugnay ang datos ng rehiyon sa pambansa at pandaigdigang datos, na mahalaga sa paggawa ng mas mahusay na mga plano sa kaunlaran.
Umaasa ang RSC na mas maraming tanggapan ng pamahalaan sa MIMAROPA ang gagamit ng mga sistemang ito upang mas mahusay na maihatid ang mga serbisyo sa mga komunidad.
