Nagpaalala si Philippine National Police (PNP) Chief Gen. Rommel Francisco Marbil sa lahat ng pulis sa kanilang mahalagang tungkulin sa pagtiyak ng malinis, maayos, at mapayapang halalan sa Mayo 12.
Sa isang command conference sa Camp Crame nitong Martes, sinabi ni Marbil, “Habang papalapit ang halalan, inaasahan ko ang pagiging propesyonal at tapat ng bawat kasapi ng PNP. Tungkulin nating protektahan ang karapatang bumoto ng mamamayan.”
Inanunsyo rin ni Marbil na simula Mayo 8, ilalatag na ang buong pwersa ng pulisya sa mga presinto, vital installations, at mga lugar na itinuturing na election hotspots. Naka-full alert na ang PNP mula pa noong Mayo 3.
Aabot sa 140,000 pulis ang ikakalat sa buong bansa para sa seguridad ng halalan. Simula Mayo 9, paiigtingin ang inspeksyon sa mga regional police unit upang sugpuin ang vote-buying at iba pang paglabag sa ilalim ng Kontra-Bigay campaign.
Pinaalalahanan din ng PNP chief ang publiko at mga kandidato na ang Mayo 10 ang huling araw ng kampanya, habang Mayo 11 ay umpisa ng liquor ban.
“Sa Mayo 12, manatiling hindi kinakampihan. Patunayan natin sa taumbayan na maaasahan ang PNP – nakikita, makatarungan, at nakatutok sa kapayapaan,” dagdag ni Marbil.
Bukod dito, pinaghahandaan na rin ng PNP ang deployment ng mga gamit gaya ng sasakyan, komunikasyon, at iba pang kagamitan, katuwang ang Commission on Elections (Comelec) at iba pang ahensya.
Samantala, nagpadala na ang PNP Highway Patrol Group ng 716 tauhan upang palakasin ang presensya ng pulis sa mga lansangan. Ayon kay Lt. Dame Malang, tutulungan din ng HPG ang lokal na pulisya sa paghatid ng election paraphernalia at pagbabantay sa mahigit 200 lugar sa bansa.
