Matagumpay na naidepensa ni Japanese junior featherweight king Naoya “The Monster” Inoue ang kanyang undisputed title laban sa Mexican challenger na si Ramon Cardenas sa main event ng Cinco de Mayo fight card na ginanap sa T-Mobile Arena sa Las Vegas, Nevada noong May 5, 2025. Nakuha ni Inoue ang panalo via TKO sa round 8. Ito rin ang kanyang comeback fight sa Amerika matapos ang huling laban niya roon noong 2021 laban sa Filipino boxer na si Michael Dasmariñas.
Tulad ng inaasahan, isang masterclass performance ang ipinamalas ni Inoue. Subalit, hindi naging madali ang laban para sa kanya. Sa round 2, isang malakas na left hook mula kay Cardenas ang tumama kay Inoue at nagpabagsak sa kanya. Ayon sa ilang boxing experts, kung mas mahaba pa ang natirang oras noon ay posibleng napuruhan si Inoue. Mabuti na lamang at agad tumunog ang bell patungong round 3.
Napansin ng mga eksperto na ang left hook ang tila “kryptonite” ni Inoue, dahil sa kanyang huling apat na laban, dalawang beses na siyang bumagsak dahil dito—katulad ng nangyari sa laban niya noon kay Luis Nery.
Pagsapit ng round 3, unti-unti nang bumalik ang composure ni Inoue. Sa dulo ng round ay nakapagpatama siya ng sunod-sunod na head and body shot combinations kay Cardenas. Bagamat may mga sagot si Cardenas, kapansin-pansing nababawasan na ang kanyang depensa. Sa round 4, tuluyan nang nakuha ni Inoue ang momentum at kontrol sa laban.
Pagsapit ng round 7, isang serye ng matitinding suntok sa ulo at katawan ang nagpatumba kay Cardenas. At sa round 8, tuluyan nang sinelyuhan ni Inoue ang laban—sa bawat suntok niya ay napapaatras si Cardenas hanggang sa mawalan ito ng depensa, dahilan upang itigil ng referee ang laban at ideklara ang TKO victory ni Inoue.
Sa panalong ito, napanatili ni Inoue ang kanyang perpektong rekord na 30 panalo (27 via KO) at 0 talo, at hawak pa rin niya ang lahat ng major titles sa super bantamweight division: WBC, WBO, IBF, WBA at The Ring Magazine Title. Para naman kay Ramon Cardenas, ito ang kanyang unang sabak sa world title fight at ngayon ay may kartadang 26 panalo, 2 talo.
Nang tanungin si Inoue ukol sa kanyang susunod na laban, sinabi niyang wala pa siyang planong umakyat sa 126 lbs (Featherweight Division) sa ngayon. Ngunit direkta niyang binanggit ang pangalan ni Murodjon Akhmadaliev o “MJ” ng Uzbekistan bilang posibleng susunod na kalaban. Si MJ ay dating hawak ang IBF Jr. Featherweight title na naagaw sa kanya ni Filipino fighter Marlon Tapales, at kalaunan ay nakuha ni Inoue para maging undisputed champion.
Kung sakaling magtagumpay si Inoue sa mga susunod na laban at magdesisyon siyang umakyat sa 130 lbs, ilan sa mga potensyal na makasagupa niya ay sina Nick Ball, Bruce Carrington, Angelo Leo, at ang kasalukuyang WBO Featherweight champion na si Rafael Espinoza.
