Idineklara ng Malacañang ang Lunes, Mayo 12, bilang isang special non-working holiday sa buong bansa upang bigyang-daan ang pagdalo ng mamamayan sa 2025 national at local elections.
Sa ilalim ng Proclamation No. 878 na nilagdaan ni Executive Secretary Lucas Bersamin sa ngalan ni Pangulong Ferdinand R. Marcos Jr., layunin ng deklarasyon na “bigyang-kakayahan ang taumbayan na maisagawa nang maayos ang kanilang karapatang bumoto.”
Kamakailan lamang ay nanawagan ang Commission on Elections (Comelec) kay Pangulong Marcos na ideklara ang Mayo 12 bilang holiday upang matiyak ang mataas na partisipasyon ng mga rehistradong botante.
Sa halalang ito, boboto ang mga Pilipino para sa mga senador, miyembro ng House of Representatives, party-list representatives, at mga lokal na opisyal gaya ng gobernador, bise gobernador, alkalde, bise alkalde, at mga miyembro ng sangguniang panlalawigan at panglungsod.
