Pinaigting ang kampanya ng Land Transportation Office (LTO) MIMAROPA laban sa mga lumalabag sa batas trapiko sa buong Tablas Island, na nagresulta sa pagkakahuli ng 286 motorista kamakailan.
Kabilang sa mga karaniwang paglabag ay ang hindi pagsusuot ng helmet, paggamit ng hindi rehistradong sasakyan, hindi paggamit ng seatbelt, at pagmamaneho nang walang validong lisensya.
Ayon kay LTO Romblon Chief Jocelyn Rillo, ang operasyon ay alinsunod sa direktiba ni LTO Assistant Secretary Vigor Mendoza na tiyaking ligtas ang mga lansangan at mabawasan ang mga aksidenteng dulot ng kawalang-disiplina sa trapiko.
Tinukoy ni Rillo na tugon din ito sa mga ulat ng aksidente sa kalsada na kinasasangkutan ng mga menor de edad at hindi lisensyadong motorista na karamihan ay hindi rin nagsusuot ng helmet.
Layon ng pinalakas na kampanyang ito na tugunan ang mga insidenteng ito at ipaalala sa publiko na tanging mga lisensyadong driver na may rehistrado at maayos na sasakyan lamang ang dapat nasa kalsada.
Binigyang-diin rin niya ang kahalagahan ng mahigpit na pagpapatupad ng mga regulasyong ito upang maprotektahan hindi lamang ang mga drayber kundi pati na rin ang mga pedestrian.
Ang mga nahuling motorista ay nabigyan ng citation tickets at kailangang bayaran ang kaukulang multa sa opisina ng LTO.
Tiniyak naman ng ahensya na magpapatuloy ang ganitong mga operasyon upang maisulong ang disiplina sa trapiko at kaligtasan sa buong lalawigan.
