Itinanghal na kampeon sa katatapos na Tata Steel Chess Championship 2025 si Rameshbabu Praggnanandhaa ng India matapos niyang talunin sa tie-break ang kanyang kababayan at kasalukuyang World Chess Champion na si Gukesh Dommaraju sa iskor na 2-1. Dahil dito, siya ang nagwagi sa prestihiyosong torneo.
Ang Tata Steel Chess Tournament ay isang taunang event na ginaganap sa Wijk aan Zee, Netherlands, at ngayong taon ay idinaos ito mula Enero 17 – Pebrero 2, 2025. Lumahok dito ang 14 sa pinakamahuhusay at pinakamataas na rated chess players sa buong mundo, kabilang sina Wei Yi ng China na defending champion, Fabiano Caruana ng USA, Alexey Sarana ng Serbia, Nodirbek Abdusattorov ng Uzbekistan, Vincent Keymer ng Germany, Vladimir Fedoseev ng Slovenia, Max Warmerdam ng Netherlands, Anish Giri ng Netherlands, Jorden van Foreest ng Netherlands, Gukesh Dommaraju ng India na kasalukuyang World Champion, Rameshbabu Praggnanandhaa ng India, Arjun Erigaisi ng India, Pentala Harikrishna ng India, at Leon Luke Mendonca ng India.
Matapos ang 13 rounds, parehong may 8.5 points sina Pragg at Gukesh, kaya kinailangan ng tie-break match upang madetermina ang kampeon. Ang tie-break ay dalawang blitz games na may 2-minute time control at 2-second increment per move. Kung nagtabla pa rin pagkatapos ng dalawang laro, magkakaroon ng sudden death match.
Sa tie-break, unang nanalo si Gukesh, ngunit nagawang bumawi ni Pragg sa huling dalawang laro, dahilan upang siya ang tanghaling kampeon.
Sa final standings ng torneo, si Rameshbabu Praggnanandhaa ang nanguna na may 8.5 puntos, kasunod si Gukesh Dommaraju na may 8.5 puntos, habang nasa ikatlong puwesto si Nodirbek Abdusattorov na may 8 puntos. Sinundan siya ni Vladimir Fedoseev na may 7.5 puntos, Anish Giri at Wei Yi na parehong may 7 puntos, at Pentala Harikrishna na may 6.5 puntos. Nagtapos naman sina Vincent Keymer at Fabiano Caruana na may tig-6 na puntos, habang si Arjun Erigaisi ay may 5.5 puntos. May tig-5.5 puntos din sina Jorden van Foreest at Alexey Sarana, habang si Leon Luke Mendonca ay may 5 puntos at si Max Warmerdam ay nagtapos na may 4.5 puntos.
Dahil sa panalong ito, pasok na si Pragg sa Candidates Tournament 2026, kung saan malalaman kung sino ang susunod na challenger ni Gukesh Dommaraju para sa World Chess Championship title.
