Magdaraos ng dalawang araw na chess tournament ang San Fernando Chess Club sa darating na Pebrero 15–16, 2025. Ang event ay gaganapin sa Covered Court ng Barangay Pili sa bayan ng San Fernando, Sibuyan Island, Romblon.
Ayon kay Ginoong Nonong Reyes, Presidente ng San Fernando Chess Club, layunin ng torneo na makadiskubre ng mga bagong talento at mga potensyal na chess masters mula sa isla ng Sibuyan. Dagdag pa ni Ginoong Reyes, ang unang araw ng torneo ay nakalaan lamang para sa mga Sibuyanon – kabilang ang mga mula sa Cajidiocan, San Fernando, Magdiwang, at mga Sibuyanon na nakatira sa ibang lugar. Sa ikalawang araw naman ay isasagawa ang Open Tournament na bukas para sa lahat, maging rated man o hindi ang mga kalahok.
Ang tatanghaling kampeon sa Sibuyan-Wide Tournament sa unang araw ay mag-uuwi ng PHP 7,000, habang ang ikalawang pwesto ay makakakuha ng PHP 5,000. Ang ikatlong pwesto ay magwawagi ng PHP 3,000, ang ikaapat na pwesto ng PHP 2,000, at ang ikalimang pwesto ng PHP 1,000. Para naman sa Open Tournament sa ikalawang araw, ang kampeon ay makakakuha ng PHP 10,000, ang ikalawang pwesto ng PHP 8,000, ang ikatlong pwesto ng PHP 6,000, ang ikaapat na pwesto ng PHP 4,000, at ang ikalimang pwesto ng PHP 3,000. Ang mga makakakuha ng ika-anim hanggang ikawalong pwesto ay makakatanggap ng PHP 2,000 bawat isa, habang ang ikasiyam at ikasampung pwesto ay makakatanggap ng PHP 1,500 bawat isa. Mayroon ding mga special awards tulad ng Top Female Player, Top Kiddie, at Top Senior.
Puspusan na ang paghahanda ng mga miyembro ng San Fernando Chess Club para sa torneo. Kasalukuyan silang nagsasagawa ng serye ng mga mini-tournaments at tune-up games bilang bahagi ng kanilang preparasyon. Ayon pa kay Ginoong Reyes, inaasahan nilang dadaluhan ang torneo hindi lamang ng mga Sibuyanon kundi pati na rin ng mga wood pushers mula sa iba’t ibang bayan sa Romblon at sa iba pang lugar.
Ang torneo ay gagamit ng 7-round Swiss System format na may 20-minute time limit. Ang registration fee para sa unang araw ay PHP 200, samantalang sa ikalawang araw ay PHP 300 para sa mga Sibuyanon native at PHP 500 para sa mga mula sa ibang lugar.
Para sa mga interesado, maaaring makipag-ugnayan kina Ginoong Nonong Reyes, Ptr. Jojo Forcadas, at Mr. Joe Hammer Banglisan sa kanilang mga Facebook accounts o sa mga sumusunod na numero: 0946-0697-973 at 0927-5115-013.
Sa kasaysayan, ilan sa mga kilalang chess masters mula sa isla ng Sibuyan ay sina Dr. Jenny Mayor, ang unang National Master (NM) mula sa lugar, Arena Grand Master (AGM) Joseph Galindo, National Master (NM) Jasper Faeldonia, Arena International Master (AIM) Jerrick Faeldonia, at Arena International Master (AIM) Ernie Faeldonia mula sa bayan ng Odiongan. Kasama rin si Women FIDE Master (WFM) Jemaicah Yap Mendoza, ang pinakabatang WFM mula sa Sta. Maria, Romblon.
