Maganda ang naging takbo ng Gilas Pilipinas Basketball Team sa ilalim ng pamumuno ni Tim Cone. Sa kanyang paghawak, nag-uwi ng sunud-sunod na tagumpay ang koponan, kabilang na ang pagkapanalo sa Asian Games noong 2023 at pagdomina sa mga malalakas na koponan gaya ng Latvia at New Zealand.
Sa kasalukuyan, ang Gilas ay may undefeated record sa ongoing FIBA Asia Cup Qualifying Tournament, ngunit nagiging alanganin ang kanilang sitwasyon matapos magkasunod na ma-injure ang kanilang mga pangunahing bigman.
Noong Enero 5, 2025, nagtamo si Kai Sotto ng torn ACL injury sa kaliwang tuhod habang naglalaro para sa Koshigaya Alphas sa Japan B.League laban sa Seahorses Mikawa. Sa kanyang kasalukuyang season, nag-average si Sotto ng 13 puntos at 9 rebounds kada laro, at malaki ang kanyang naging kontribusyon sa undefeated 4-0 record ng Gilas sa FIBA Asia Cup Qualifying Tournament. Dahil sa kanyang injury, tinatayang hindi makakapaglaro si Sotto ng anim na buwan.
Samantala, nagtamo rin ng torn ankle ligament injury ang 2-time UAAP MVP na si Kevin Qiambao habang naglalaro sa kanyang debut game para sa Goyang Sono Skygunners sa Korean Basketball League (KBL) laban sa Seoul SK Knights. Nangyari ang injury habang tumitira siya ng 3-point shot at mali ang naging landing. Tinatayang mawawala si Qiambao sa aksyon nang higit isang buwan.
Dahil sa mga injuries na ito, agad na humingi ng tulong si Tim Cone sa PBA upang maisama sa training camp ang dating Gilas player na si Troy Rosario, na agad namang tumugon. Ayon kay Rosario, ang kanyang pagbabalik sa Gilas ay isang pagkakataon para sa “redemption” matapos ang pagkatalo ng Gilas sa Indonesia noong 2022 SEA Games Gold Medal Match. Isa pang inaasahang makakasama sa line-up ay ang dating Gilas player na si Jaime Malonzo.
Magpupunta ang Gilas sa Doha, Qatar para sa serye ng tune-up games at training camp bilang paghahanda sa 3rd window ng FIBA Asia Cup Qualifiers. Makakalaban ng Gilas ang Chinese Taipei sa Pebrero 20, 2025, at ang New Zealand sa Pebrero 23, 2025. Parehong away games ang dalawang laban. Bagamat bukas si Coach Tim Cone sa mga pagbabago, nais niyang panatilihin ang core line-up ng team, kabilang sina Justin Brownlee, Junemar Fajardo, Chris Newsome, Dwight Ramos, Calvin Oftana, Scottie Thompson, CJ Perez, AJ Edu, Mason Amos, Carl Tamayo, at Japeth Aguilar.
Sa kasalukuyan, pasok na ang Gilas Pilipinas sa FIBA Asia Cup 2025 na gaganapin sa Jeddah, Saudi Arabia, mula Agosto 5–17, 2025. Makakasama nila ang iba pang nakapasok na teams gaya ng Australia, New Zealand, Japan, Lebanon, Jordan, at ang host country na Saudi Arabia.
Bagamat nasa alanganing sitwasyon ang Gilas, mataas pa rin ang kumpiyansa ng kanilang coaching staff at mga tagahanga na maipagpapatuloy ng koponan ang kanilang magandang performance sa darating na torneo.
