Hindi na matutuloy ang laban sa pagitan ng undefeated Japanese super bantamweight champion na si Naoya Inoue at ang kanyang undefeated Australian challenger na si Sam Goodman.
Ang laban na dapat sana’y gaganapin sa Enero 24, 2025, sa Ariake Arena sa Tokyo, Japan, ay nakansela matapos mag-withdraw si Goodman dahil sa muling paglala ng kanyang natamong eye injury habang nasa sparring session. Nauna nang nakansela ang laban na ito noong Disyembre 24, 2024, dahil rin sa parehong dahilan.
Sa kabila ng pagkakansela ng laban kay Goodman, tuloy pa rin ang laban ni Inoue sa Enero 24, 2025, kung saan ipagtatanggol niya ang kanyang WBC, WBA, WBO, IBF, at The Ring Super Bantamweight Championships laban sa bagong challenger na si Kim Ye Joon ng South Korea. Si Kim, na kilala bilang “Pacquiweather,” ay may record na 21 panalo, 2 talo, at 2 draw, kasama ang 13 knockout. Siya ay kasalukuyang ranked No. 11 sa WBO at ito ang magiging pinakamalaking laban sa kanyang karera, pati na rin ang kanyang unang world title shot. Ang huli niyang laban ay laban kay Rakesch Lochchab ng India noong Mayo 24, 2024, kung saan nanalo siya via fifth-round TKO.
Samantala, si Naoya “The Monster” Inoue na may malinis na record na 28 panalo, walang talo, at 25 knockouts, ay nakatakdang sumabak sa kanyang ika-26 world title fight. Ang kanyang huling laban ay laban kay TJ Doheny ng Ireland, na kanyang tinalo via seventh-round TKO noong Setyembre 3, 2024. Maliban kay Doheny, marami na ring mga Filipino fighters ang tinalo ni Inoue, kabilang sina Warlito Parrenas, Jerson Mancio, Michael Dasmariñas, Nonito Donaire, at Marlon Tapales.
Si Inoue ay kabilang sa mga natatanging boksingero sa kasaysayan ng boxing. Tatlo lamang ang naging undefeated undisputed champion na sabay-sabay humawak ng WBC, WBA, WBO, IBF, at The Ring Magazine titles sa kanilang mga division. Kabilang dito si Inoue sa super bantamweight division, pati na rin sina Ukrainian heavyweight Oleksandr Usyk at American super welterweight champion Terence Crawford.
Inaasahan ng mga tagahanga ang laban sa Enero 24, na tiyak na magbibigay ng isa pang makasaysayang tagumpay sa karera ni Inoue.
