Isang bagong bituin ang sumisikat sa larangan ng chess mula sa probinsya ng Romblon—si Jemaicah Yap Mendoza, 12 taong gulang, at unang Women’s National Master (WNM) at Women’s FIDE Master (WFM)-Elect mula sa Romblon.
Si Jemaicah ay taga-Sitio Malag-Alag, Concepcion Norte, Sta. Maria, Romblon, at patuloy na nagbibigay karangalan sa kanyang probinsya at sa bansa sa kanyang mga tagumpay sa chess.
Ayon sa kanyang ama, si Benjamin Mendoza, na nakausap namin via video call, nagsimulang maglaro ng chess si Jemaicah noong siya ay 8 taong gulang, sa intramural meet ng kanilang eskwelahan noong siya’y nasa grade 2 pa lamang. Noong 2019, naging kampeon siya sa Romblon Provincial Meet. Bagama’t naapektuhan ng pandemya ang sports competitions, hindi tumigil si Jemaicah sa kanyang online trainings. Noong 2022, nakatanggap siya ng imbitasyon upang i-represent ang Pilipinas sa National Age Group Chess Tournament sa Thailand, kung saan siya ang nanguna. Noong 2023 naman, naging bahagi siya ng Palarong Pambansa, na ginanap sa Marikina, at nirepresenta niya ang MIMAROPA.
Ngayong 2024, isa sa pinakamalaking chess tournament na sinalihan ni Jemaicah ay ang katatapos lamang na Asian Juniors and Girls Championships sa Knights and Templar Hotel, Tagaytay City, mula October 11–20, 2024. Sa torneong ito, target niyang makamit ang 1,900 Elo rating upang opisyal na maging WFM. Bagama’t kinulang lamang siya ng .2 points, umabot siya sa 1,899.8 live rating. Sa 9 rounds ng tournament, nakalikom si Jemaicah ng 4.5 puntos at nagtapos bilang ika-12 sa standard category at ika-10 sa rapid under-20 category.
Para mas mapagtuunan ang kanyang training, nagpasya ang pamilya ni Jemaicah na lumipat sa Sta. Rosa, Laguna, kung saan siya mag-aaral. Patuloy naman ang suporta ng kanyang mga kababayan mula sa Sta. Maria at buong Romblon. Pinangunahan nina Bernie Festin at Magie Festin Cawaling, mula sa Santa Fe Chess Knights, ang pagiging pangunahing sponsor ni Jemaicah sa nakaraang torneo sa Tagaytay.
Bago matapos ang taon, sasabak muli si Jemaicah sa isang international tournament—ang Singapore International Open mula November 24–December 5, 2024. Dahil dito, patuloy ang panawagan ng kanyang ama, si Benjamin Mendoza, para sa pinansyal na suporta sa mga paparating na torneo ni Jemaicah. Ang sinumang nais magpaabot ng tulong ay maaaring makipag-ugnayan kay Benjamin Mendoza sa kanyang Facebook account na Benjamin P. Mendoza o magpadala sa kanyang GCash account 09950219567.
