Naging matagumpay ang comeback fight ni John Reil “Quadro Alas” Casimero matapos ang isang taong pamamahinga, nang pabagsakin niya ang Amerikanong si Saul Sanchez sa loob ng 2 minuto at 41 segundo sa 1st round ng kanilang 10-round bout na ginanap sa Yokohama Bodokan, Japan noong October 13, 2024.
Ipinakita ni Casimero ang kanyang dominasyon sa laban, na tila walang nagbago sa dating 3-division titleholder. Gayunpaman, nabalot ng kontrobersya ang laban dahil sa pagiging overweight ni Casimero, na lumagpas ng 1 kilo sa 122 lbs weight limit. Sa kabila ng pagsisikap na magbawas ng timbang, tumimbang siya ng 123 ½ lbs bago ang mismong araw ng laban. Pinili pa rin ng kampo ni Sanchez na ituloy ang laban.
Sa kanyang post-fight interview, sinabi ni Casimero na kung ang laban ay para sa world title, pipilitin niyang maabot ang 122 lbs weight limit, ngunit dahil hindi ito para sa titulo, ayos lang daw na sumobra siya. Kasama rin sa mga binitawang salita ni Casimero ang paghahamon kay Naoya Inoue, ang undisputed champion sa 122 lbs.
Noong 2020, naka-schedule ang laban nila ni Inoue, ngunit naantala ito dahil sa pandemya at mga kontrobersyang kinasangkutan ni Casimero. Bagaman handa raw ang kampo ni Inoue na labanan si Casimero, kailangan daw ito daanin sa tamang proseso. Kasalukuyang ranked 6th at 7th si Casimero sa WBO at WBC. Ang kanyang record ay 34 wins, 4 losses, 1 draw, at 23 knockouts, samantalang si Sanchez ay nakatamo ng kanyang unang professional stoppage loss.
Hindi rin pinalagpas ng Japan Boxing Commission (JBC) ang pagiging overweight ni Casimero at pinatawan siya ng isang taong suspensyon. Ayon kay Tyuyoshi Yasukochi, opisyal ng JBC, ito ay alinsunod sa kanilang patakaran. Hindi maaaring lumaban si Casimero sa Japan sa loob ng isang taon. Treasure Boxing Promotion ang promoter ni Casimero sa laban na ito.
Samantala, isa pang Filipino na lumaban ay si Flyweight Vince Paras, ngunit siya ay nabigo laban kay Japanese fighter Hiroto Kyoguchi via majority decision sa kanilang pangatlong laban, na nagsilbing rubber match.
Sa ibang mga kaganapan sa Japan, ginanap naman sa Ariake Arena sa Tokyo ang laban sa pagitan ni Takuma Inoue at Seiya Tsutsumi para sa WBA Bantamweight Title. Nanalo si Tsutsumi via unanimous decision matapos ang knockdown sa round 6, na naging turning point ng laban. Ang kanyang record ngayon ay 12 wins, 0 losses, at 8 KO's, habang si Takuma ay may 20 wins, 2 losses, at 5 KO's.
Sa undercard ng laban ni Inoue at Tsutsumi, nanalo si Kenshiro Teraji ng Japan laban kay Cristofer Rosales ng Nicaragua via 11th round TKO para sa vacant WBC Flyweight Title. Si Shokichi Iwata ng Japan ay tinalo si Jairo Noreiga ng Spain via 3rd round stoppage para sa vacant WBO Light Flyweight Title, at napanatili naman ni Seigo Yuri Akui ang kanyang WBA Flyweight Title matapos talunin via split decision si Thananchai Charanphak ng Thailand.
Sa sumunod na araw, October 14, 2024, naganap ang isa pang world title fight sa pagitan ng undefeated Japanese Champion Junto Nakatani at ang kanyang number 1 contender na si Petch Sor Chitpattana ng Thailand para sa WBC Bantamweight Title. Nakatani retained his title after a dominant performance, knocking down Chitpattana in round 6.
Sa co-main event ng laban, natalo ang Filipino fighter na si Gerwin “the Gladiator” Asilo laban sa Japanese fighter na si Tenshin Nasukawa via unanimous decision para sa vacant WBO Asia Pacific Bantamweight Title. Sa isa pang laban, naagaw ni Phumelele Cafu ng South Africa ang WBO Junior Bantamweight Title laban kay Kosei Tanaka ng Japan via split decision.
