Binuksan na sa Odiongan, Romblon nitong huling araw ng Women's Month ang Women's Sewing Center na proyekto ng LGU Odiongan Local Council for Women at Samahang Mananahi ng Odiongan (SMO).
Ang sewing center ay inaasahang paglalagyan ng mga sewing machine para sa produksyon ng mga produkto ng SMO katulad ng mga tote bag, kurtina, at mga uniform.
Nabuo rin ang proyekto maging ang grupo ng SMO sa tulong ng Technical Education and Skills Development Authority, Department of Labor and Employment, at Department of Trade and Industry.
Sa opening ceremony ng lugar nitong Biyernes, sinabi ni Odiongan Mayor Trina Firmalo-Fabic na malaking bagay ang pagkakaroon ng dagdag hanap buhay para sa grupo ng mga kababaihang miyembro ng SMO.
Aniya, bagama't maliit palang ang lugar na nilagyan ng sewing center sa Odiongan Comercial Center, hangad nito ang mas malaking production area para sa grupo.
“Ang request ko lang po ay huwag po tayong sumuko agad. Dapat tuloy-tuloy lang at mahusay lang lagi ang komunikasyon sa isa't isa,” hamon nito sa mga miyembro ng grupo.
Ani naman ni SMO President Babylyn Rubion, ang proyekto ay malaking tulong sa kanila lalo dahil ngayon umano ay may naiuuwi nang kita ang kanilang mga miyembro sa kanilang mga bahay.
Ang SMO ay may 24 na sewing machine na ngayon na nakakalat sa iba't ibang barangay ng Odiongan para umano mas malapit sa mga miyembro.
