Nakakaranas ng rotational brownout ang buong isla ng Sibuyan Island, sa gitna ito ng sobrang init na panahon ngayong summer season.
Ayon sa mga residente ng lugar, 5 hanggang 10 oras na nakakaranas ng power interruption ang ilang lugar sa isla dahil sa ipinatutupad na load shedding ng National Power Corporation (NAPOCOR) at ng Romblon Electric Cooperative, Inc. (ROMELCO).
Kulang umano ang supply na kuryente na nagagawa ng NAPOCOR dahil ang ilang mga gensets nila ay hindi operational o di kaya ay may mga sira.
April 11 nang magsimulang mag-anunsyo ang Romelco Cajidiocan branch na magkakaroon sila ng rotational brownout sa mga piling lugar. Ayon sa ROMELCO, 1.4MW lamang ang kayang gawin ng NAPOCOR dadgdag sa 380 kilowatt na kuryente naman na kayang ibigay ng Cantingas Mini Hydro Powerplant. Batay sa kasalukuyang datus, may demand ang isla na 2.5MW na kuryente.
Patuloy naman umanong ginagawa ng ROMELCO ang kanilang makakaya para matulungan ang NAPOCOR na maibalik sa normal ang operasyon ng kuryente sa isla ng Sibuyan.
