Nakipagtuwang ang Department of Tourism (DOT) MIMAROPA sa Office of Product and Market Development (OPMD) kasama ang Lokal na Pamahalaan ng Marinduque upang isagawa ang “Challenge Accepted: Marinduque Cycling Experience” noong Enero 23 hanggang 27.
Kasalukuyang isinusulong ng DOT MIMAROPA na gawing bagong pangturismong gawain sa probinsya ng Marinduque ang cycling. Bineripika ito ng mga eksperto na binubuo ng 20 katao mula sa DOT Mimaropa, OPMD, National Cycling Association, Philippine Cycling Association, cycling influencers, PHILTOA, PTAA at NAITAS.
Ang apat na araw na gawain ay itatampok ang mga pinagmamalaking destinasyon at gawain sa probinsya na maaaring linangin bilang cycling destination sa bansa. Para sa unang araw ng beripikasyon ng grupo; nagtungo ang mga ito sa Pamahalaang Panlalawigan ng Marinduque kung saan nasaksihan at naranasan ng mga ito ang “Putong”. Ang Putong ay isang seremonya na isinasagawa upang tanggapin ang mga bisita kasabay sa saliw ng tugtugin/kanta na nagpapahayag ng pasasalamat, at dasal para sa mas masaganang buhay. Nagbisekleta rin ang mga ito sa kahabaan ng daan ng Boac; Cultural Heritage District kasama ang mga ancestral houses, Laylay Port, at Boac cathedral. Matapos ang lakbayin ng mga ito kumain ito ng mga masasarap na pagkain, partikular ang mga lutong makikita lamang sa Marinduque.
Sa ikalawang araw ng naturang aktibidad; bumisita naman ang mga ito sa iba’t-ibang atraksyon na makikita sa Gasan at Torrijos partikular ang mga pinagmamalaki nilang atraksyong pangkalikasan.
Para naman sa ikatlong araw ng gawain; nagtungo ang grupo sa bayan ng Mogpog upang personal na makasama at makausap si Salvador “Buddy” Liwanagan, isang kilalang mangagawa ng maskara para sa Morion sa naturang probinsya.
Mula naman dito, nagtungo ang grupo sa Luzon Datum 1911, kung saan makikita ang stone marking na simbolo ng geodetic center ng bansa na matatagpuan sa tuktok ng Mt. Mataas. Upang marating ito kailangan umakyat ng turista ng 468 steps.
Nagtapos ang ikatlong araw ng gawain sa Panuluyan Farmstay kung saan nabigyang pagkakataon ang grupo na madagdagan ang kaalaman hinggil sa naturang farm at ang epekto nito sa mga mamama yankung saan karamihan ng mga miyembro rito ay nagmula sa komunidad na kinatatayuan nito.
Sa panghuling araw ng aktibidad, bumisita ang mga Sta. Cruz Church, isa sa pinaka lumang simbahan sa probinsya. Matapos ito; nagtungo naman ang grupo sa Paadjao Falls kung saan nagtampisaw ang mga ito at naranasan ang malamig at masarap na tubig mula sa talon.
Matapos ang serye ng mga naging aktibidad; nagpulong ang grupo sa posibilida na maging cycling tourist destination ang Marinduque sa pamamagitan ng pagbabahagi ng mga karanasan ng mga ito sa bawat isa at kung papaano pa mas mapapaunlad ang konseptong ito mula sa ahensiya. (JJGS/PIA MIMAROPA)
