Nagtamo ng sugat sa kamay ang isang driver ng truck sa Romblon, Romblon matapos makailang beses itong paluin ng isang lalaki sa bayan ng Romblon, Romblon kamakailan.
Ang biktimang ay kinilalang si Melchor Montojo, 43, residente ng Barangay Lunas.
Batay sa imbestigasyon ng Romblon Municipal Police Station, lumapit umano sa biktima at sa kasama nito ang suspek na si Angelo Rotoni Seraspi, 32, para humingi sana ng sigarilyo o ‘yusi' ngunit walang maibigay ang biktima.
Umalis sandali ang suspek, at bumalik dala-dala na ang kahoy na ginamit ng suspek sa krimen.
Matapos maawat ang suspek, agad itong tumakas sa lugar, ngunit naaresto rin kalaunan ng mga rumespondeng tauhan ng Romblon Municipal Police Station.
Patuloy ang imbestigasyon ng kapulisan sa nangyari para matukoy ang posibleng malalim na dahilan nang suspek para gawin ang krimen.
Mahaharap ito sa kasong Physical Injury.
