Pinsala sa agrikultura ang sinira ng bagyong Paeng sa bayan ng Concepcion sa isla ng Sibale, Romblon sa pagdaan nito sa bansa.
Sa panayam ng PIA Romblon kay Concepcion Mayor Nicon Fameronag nitong Linggo, ibinahagi nito na maraming mga tanim na saging sa kanilang bayan ang itinumba ng bagyo.
“Dito sa amin, wala namang namatay dahil sa bagyo, pero marami ‘yung nasirang tanim, katulad ng mga saging,” pahayag ni Fameronag.
Nagsimula na rin umano silang magsagawa ng rapid assesment sa mga barangay upang matukoy ang totoong datus ng mga napinsala ng bagyo.
Batay naman sa ulat ng Concepcion Public Information Office, ang mga lumikas sa mga evacuation centers ay nakabalik na sa kanilang mga bahay at nahatiran na rin ng mga food packs bilang tulong sa kanila ng lokal na pamahalaan.
