Sinimulan noong September 29, 2026 ang libreng serbisyong dental ng Provincial Government of Romblon sa pakikipag-ugnayan sa Lokal na Pamahalaan ng Concepcion para sa mga residente ng bayan.
Pinangunahan ni Dr. Erick Blanco, dentista ng Provincial Government of Romblon, ang dental services sa Rural Health Unit (RHU) ng Concepcion, kung saan nakatakda siyang magserbisyo hanggang October 2, 2026.
Ayon kay Governor Trina Firmalo-Fabic, isinagawa ang programa upang mailapit ang serbisyong dental sa mga residente ng Concepcion matapos matukoy na ilang residente mula sa Sibale ang bumibiyahe patungong Mindoro para magpatingin o magpabunot ng ngipin.
Ibinahagi ni Laila Fabreag, Barangay Health Worker mula sa Barangay Bachawan, na walang dental clinic sa kanilang lugar kaya kinakailangan ng mga residente na bumiyahe patungong Mindoro para sa tooth extraction.
“Laking tulong po talaga sa amin itong ginagawang libreng bunot dito sa isla namin kasi kung Mindoro kami pupunta, double gastos po ang mangyayari,” ani Fabreag.
Isa si Fabreag sa mga sumailalim sa tooth extraction sa isinagawang libreng serbisyong dental, kasama ang ilan sa kanyang mga anak.
Samantala, sinabi ni Nelia F. Yap, residente ng Sibale, na mayroon silang dental clinic sa lugar ngunit wala itong regular na dentista matapos magretiro ang dating dentista na nagsisilbi roon noong bandang 2016 o 2017.
Ayon kay Yap, nagtutungo pa sa Mindoro ang ilang residente na nangangailangan ng tooth extraction, na nangangahulugan ng dagdag na gastos para sa serbisyo at pamasahe.
“Salamat at binigyan tayo ng isang leader na may serbisyong taos sa puso ang pagtulong sa mga kababayan. Tuwang-tuwa nga ang mga taga-Sibale nang malaman na may libreng bunot,” ani Yap.
