Sa harap ng mainit na kape at pandesal, aba'y mainit ang balitaktakan ng ilang kurimaw natin na pinagdedebatihan kung dapat bang tumakbong bise presidente sa 2022 elections si President Mayor Digong Duterte.
Hirit ng isang kurimaw, dapat magretiro na raw ang pangulo pagkatapos ng kaniyang termino sa June 30, 2022 para ma-enjoy na niya ang buhay. Sa dami raw ng problema ng bansa na kinaharap ng pangulo, aba'y marapat naman daw makapagpahinga na siya.
May katwiran naman sa puntong iyon ang kurimaw natin dahil mismong si President Mayor Digong eh nagsabi na rin noon na gusto niya ring makapag-relax dahil sa bukod sa kaniyang edad eh may mga sakit na siya.
Pero hirit naman ng ibang kurimaw, mas kaunti na lang naman trabaho ng vice president kaya hindi naman masyadong mahihirapan ang pangulo. Mas maganda raw na manatili sa pulitika si PDu30 para magpaalala sa susunod na administrasyon na ipagpatuloy ang kaniyang mga nasimulan.
Aba'y may tama rin naman siya na hindi kasing bigat ng trabaho ang VP kumpara sa Prexy lalo na kung walang posisyon sa Gabinete na ibibigay sa kaniya ang susunod na pangulo. Tawag nga ng iba sa VP ay “spare tire” na abangers lang na mawala o matsugi ang presidente para pumalit ang VP.
Sa usapin na ang VP ang papalit kapag hindi na kaya ng pangulo na magtrabaho, muling humirit ang isang kurimaw na iyon ang isa pang dahilan kaya hindi raw dapat tumakbong VP si PDu30.
Iniisip kasi niya ang senaryo na baka kapag nanalong VP si PDu30 at ang manok niya sa panguluhan, baka raw biglang magbitiw ang presidente sa kung anumang dahilan at balik sa pagiging PDu30 si VPDu30.
Ano nga ba ang tiyansa na maging presidente ang bise presidente? Sa kasaysayan ng pagkakaroon na natin ng 15 pangulo mga tropapips, apat na beses pa lang na naging pangulo ang bise presidente–tatlo sa mga dahilan nito eh natsugi ang presidente.
Naging presidente ang dating VP na si Sergio Osmeña nang mamamatay sa sakit si Pangulong Manuel L. Quezon. Inatake sa puso si Pangulong Manuel Roxas, kaya pumalit sa kaniya ang VP na si Elpidio Quirino.
Namatay naman sa pagbagsak ng eroplano si Pangulong Ramon Magsaysay, kaya pumalit sa kaniya ang VP niya na si Carlos P. Garcia. Si Pangulong Erap Estrada, nagbitiw naman kasunod ng tinatawag na “EDSA 3” people power revolt, at sumalo sa kaniyang puwesto ang VP niya na si Gloria Macapagal Arroyo.
Kung legalidad naman ang pag-uusapan kung puwede bang tumakbong VP si PDu30, sinasabi ng ilang eksperto na walang batas na nagbabawal na tumakbong sa mas mababang posisyon ang nakaupong pangulo na patapos na ang termino.
Ang tangi kasing ipinagbabawal sa batas (na nakasaad sa Konstitusyon) eh hindi na puwedeng tumakbong pangulo sa kaparehong puwesto ang pangulong nakatapos ng kaniyang termino.
Kung tumakbo nga at manalong VP si PDu30 at sa kung anumang dahilan eh mawala ang kasabay niyang presidente, maliwanag pa sa sikat ng flashlight na magiging PDu30 uli si VPDu30–at siya ang kauna-unahang makakagawa nito.
Ngunit kahit nga sinabing puwede, may kasabihan din naman na “not all legal is moral.” Kaya kung tatakbo ngang VP si PDu30, tiyak na magiging maganda ang laban kung tutuloy din sa kaniyang planong maging VP si Senador Tito Sotto, na ang gustong katambal bilang pangulo eh si Senador Ping Lacson. Kaya madami ang “Abangers” pagkatapos ng State of the Nation Address (SONA) dahil magsisilbing hudyat sa mainitang bakbakan ng politika.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
