Marami ang natuwa at marami rin ang nalito mga tropapips sa lumabas na mga pahayag ng ilang opisyal tungkol sa face shield kung puwede na ba talagang hindi magsuot.
Pero bago ‘ya, aba'y kawawa naman pala ang mga kababayan nating balikbayan at mga umuwi matapos magbakasyon lang sa ibang bansa. Ang dahilan, butas ang bulsa nila pagbalik sa Pilipinas dahil daw sa mga patakaran patungkol sa quarantine.
Napapagastos daw nang malaki ang mga balikbayan dahil sila ang nagbabayad sa bawat araw ng pananatili nila sa pagdadalhan sa kanilang hotel bilang
quarantine facility.
Mabuti sana kung “big time” ang balikbayan na paldo ang baon na pera sa pag-uwi. Pero papaano kung sakto lang o naka-budget ang kaniyang pera? Baka wala na siyang maipang-blowout sa bahay.
Ang mga balikbayan din daw ang gumagastos sa swab test. Bukod pa siyempre sa nasasayang na araw ng pananatili nila sa hotel na inaabot ng 10 araw. Aba'y kung P7,000 ang hotel sa isang araw, butas agad ng P70,000 ang kanilang
bulsa.
Ganoon din kaya ang nangyayari ngayon sa mga OFWs na nagbabakasyon at nagbabalikbayan para makapiling ang pamilya sa Pilipinas? Kung sinasagot ng Labor department ang hotel ng mga OFW na nawalan ng trabaho, ibig bang sabihin eh walang sumasagot sa mga Pinoy na naninirahan na sa ibang bansa at nagbabalikbayan din lang para bisitahin ang mga kamag-anak nila sa Pilipinas?
Para kina Sens. Tito Sotto at Ping Lacson, hindi makatwiran ang naturang malaking gastusin ng mga balikbayan lalo na kung kompleto na ang kanilang bakuna sa bansa na kanilang pinanggalingan. Sayang nga naman ang 10 araw na mawawala sa kanilang bakasyon para makapiling ang mga kamag-anak nila.
Kaya dapat lang na pag-aralan ng mga kinauukulan ang patakaran sa mga balikbayan, lalo na sa mga bakunado na. Aba'y hindi makakatulong sa pagbubuhay sa turismo ang ganoong sistema.
Gaya ng problema ng mga balikbayan, nalilito rin ang mga kababayan natin na pumapasok sa trabaho dahil sa anunsyo na puwede nang hindi magsuot ng face shield kapag nasa “open space” o labas. Mababa lang naman daw ang tiyansa ng hawahan sa labas.
Pero kapag nasa kulong na lugar o loob ng establisimyento gaya ng mall, dapat magsuot pa rin daw. Kaya lang, may mga opisyal naman na nagsasabi na dapat suotin pa rin ang face shield dahil dagdag proteksiyon ito para hindi mahawa ng virus.
Ngayon ang tanong malaman ng marami: ano ba talaga kuya? Puwedeng hindi na magsuot o dapat pa rin magsuot? Baka raw kasi kapag hindi suot ang face shield ng isang tao habang naghihintay ng masasakyan sa kanto eh biglang dumating na sigang tanod at sitahin sila o tiketan. Kung nakakapagsalita lang ang face shield, malamang nagreklamo sa hilo.
Baka akalain din ng iba na puwede nang hindi naka-face shield sa loob ng mga pampublikong sasakyan, o maging sa mga simbahan na marami rin ang pasaway.
Kung sinasabi nilang bumababa na ang COVID-19 cases sa Metro Manila kaya puwede nang magluwag sa ilang patakaran, papaano naman ang sitwasyon sa mga probinsiya?
Pero sa huli, nasa tao pa rin mga tropapips ang desisyon kung gusto na nilang maging kampante kahit nasa mahigit 5 milyon pa lang ang naturukan ng first dose ng COVID vaccine at nasa 2 milyon pa lang ang nakakompleto na. Kung wala ka pang bakuna at nagiging pabaya na, lakasan mo na lang ang dasal na ‘wag kang mahawahan.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
