Nananawagan ang Office of Civil Defense-Regional Disaster Risk Reduction and Management Council – Mimaropa sa ahensiya at mga lokal na pamahalaan na paghandaan ang pagdaan ng Bagyong Auring sa rehiyon.
Dating isang tropical depression, lumakas si Auring at naging Severe Tropical Storm.
Pinalalahanan ni RDRRMC Chairperson Ruben Carandang ang Coast Guard at ang mga lokal na pamahalaan na sikaping mapigilan ang anuman pagpalaot habang dumadaan ang bagyo para iwas disgrasya.
Pinaalalahanan din ni Director Carandang ang mga LGU na may mga mataaas na banta ng panganib ng pagbaha at landslide gaya ng Marcopper areas sa Marinduque.
Ayon pa kay Director Carandang, kailangan ding tiyakin na maiwasan ang hawaan sa mga evacuation center sa pagpapatupad ng minimum health protocols at ng paglalaan ng lugar o quarantine facility sa mga positibo sa virus.
Bawat ahensiya at LGU nagprisinta ng kanilang mga paghahanda, deployment ng tauhan at pagpupuwesto ng mga kasangkapan at ng relief goods, gamot at iba pang ang suplay.
Ipinakita rin ng DENR-Mines and Geoscience Bureau ang mga lugar na maaring maapektuhan ng pagbaha at pagguho ng lupa sa bawat lalawigan.
Ang Department of Environment and Natural Resources (DENR) – Mines and Geosciences Bureau (MGB) ay mayroon ng listahan ng binabaha at pinangyayarihan ng landslide sa Mimaropa.
Batay sa forkast ng DOST-Pagasa aabutin ang Hilagang Palawan, partikular ang Cuyo at ang Busuanga sa Lunes.
Kung titingnan ang track ng bagyo posibleng mahagip ng Bagyong Auring ang Mindoro, Marinduque at Romblon. (LP/PIA-4B)
