Kung maingay at may tunog na “speaker” lang mga tropapips na katulad ng mga ibinebenta sa Raon ang mga Deputy Speaker sa Kamara de Representantes, malamang na mabibingi na ang mga kongresista dahil sa sobra nilang dami.
Pero bago tayo mabingi sa sobrang dami ng DS ni Speaker Lord Allan Velasco, aba'y hindi naman pala all bad mga tropapips ang mangyayari sa mundo sa taong ito ng 2020.
Dahil simula sa Disyembre 21, sa paglubog ng araw, may pagkakataon na makita kahit dito sa Pilipinas ang pambihirang “Christmas star” na nasusulyapan lang daw tuwing ika-800 taon.
Mantakin nyo mga tropapips, kung isang daan taon ang edad niyo at muli kayong mabubuhay, aba'y walang beses na kayong nadedo bago niyo uli makita ang Christmas star. Ito yung “tala” na nakikita natin sa mga Christmas card na nagniningning at parang nagtuturo sa tatlong hari kung nasaan si Baby Jesus.
Hindi natin alam mga tropapips kung sadyang tuwing Disyembre ba lumalabas ang Christmas star pero ang ganda naman ng timing nito dahil lilitaw siya ilang araw bago ang birthday ni Jesus.
Sinasabing nabubuo ang disenyo ng Christmas star kapag ang dalawang higanteng planeta na Saturn at Jupiter eh nagkahilera na nagmumukhang isang bituin sa tamang anggulo.
Malay natin mga tropapips, baka puwedeng mag-wish ang mga makakakita sa tala at puwede niyo nang hilingin ang mga nais niyo tulad ng pagkawala ng COVID, manalo sa lotto, babait ang biyenan o may opisyal kayong nais na mapatalsik sa puwesto.
Speaking of mapatalsik sa puwesto, ibinulong ng mga kurimaw natin sa Kamara na baka hindi magtagal sa trono itong si Velasco, na pumalit kay Alan Peter Cayetano bilang lider ng mga kongresista sa pamamagitan lang ng kasunduan na term sharing.
Sa ngayon daw kasi, hindi pa nakikitaan ng tinatawag na “leadership” quality si Velasco at walang inasikaso kung hindi sibakin sa puwesto at komite ang mga kongresistang maka-Cayetano at ilagay ang kaniyang mga alipores.
Ang matindi, sa dami ng nais ni Velasco na gantimpaan at bigyang kapangyarihan, aba'y kung saan-saan na niya inilalagay. Kung noon ay tatlo lang ang itinatalagang deputy speaker, na kinalaunan ay naging anim, at nadagdagan pa nang nadagdagan sa paglipas ng panahon–ngayon kay Velasco, nasa 29 na ito.
Ang deputy speaker mga tropapips eh parang “vice speaker” na susunod sa pinakamataas na lider sa Kamara. Kaya noong una, prestihiyo ang posisyon para sa deputy speaker sa Luzon, Vizayas at Mindanao. Kinalaunan, Dinagdagan para malagyan na rin ng deputy speaker ang ilang sektor at maging ang bawat malalaking rehiyon.
At sa paglipas pa ng panahon, naging parang kendi na lang na pangtakaw sa mga kongresista ang naturang posisyon kapag may nangyayaring agawan sa liderato.
Sabi ng ating kurimaw, kung hindi makapagpapakitang gilas si Velasco bilang lider ng kapulungan tulad sa pagsasalita sa mga isyung inaatake ang institusyon, at kung puro balasahan pa rin ang aatupagin, hindi raw malayong magkaroon ng bagong speaker.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
