Kapit lang mga tropapips at konting kembot na lang ika nga at matatapos na ang tinatawag na “wasted” year na 2020. Pero ang tanong ng marami nating kurimaw na nananalangin ng 13th month pay, may pambulaga pa kayang inihahanda ang 2020?
Gaya ng mga payo ng mga eksperto, hindi lang katawan ang dapat na panatilihing malusog sa panahong ito ng pandemiya kung hindi maging ang ating isip o emosyon.
Hindi naman kaila na marami ang tinamaan ng COVID-19 sa Pilipinas na mahigit 400,000 na at mahigit 8,000 na ang namatay. Aba'y hindi biro ang mahigit 8,000 na buhay na nawala sa loob lang ng walong buwan–and still counting pa mga tropapips ang nagkakasakit.
Pero bukod sa mga tinamaan ng COVID-19, may iba pa tayong mga kababayan na hindi na siguro kinaya ang hirap ng kalooban at nagpasyang lisanin na ang mundong ibabaw. Marahil ang mga mababalitaan lang natin ngayon na winawakasan ang sarili nilang buhay eh yung mga kilalang personalidad, pero marami ang mga “karaniwang” tao na hindi na naibabalita.
Sabi nga sa mga ulat, marami ang nakararanas ngayon ng labis na pag-aalala at depresyon dahil sa maraming oportunidad ang nasayang at naging limitado ang kilos para magkaroon ng makakausap. Pero konting tiis na lang mga tropapips, magdasal at magpakatatag dahil inaasahan nang magkakaroon ng bakuna laban sa made in China na COVID.
Pasasaan ba't babalik na rin sa normal ang lahat sa 2021–may awa ang Diyos. Hindi ba't maraming mag-jowa ang nagsabing walang forever kaya hindi rin forever ang hinayupak na pandemyang ito.
Ngunit ang tanong pa rin ng mga kurimaw natin bukod sa kung may matatanggap silang 13th month pay, tapos na raw kaya ang pagpapahirap ng 2020? May mas matindi pa kayang mangyari sa Pilipinas bukod sa biglaang breakup nina Andea Torres at Derek Ramsay?
Noong 2019, kahit nakakapagod din ang dami ng kalamidad ng nagdaang taon gaya ng mga bagyo at lindol, aba'y kahit papaano eh pinalad pa pala ang Pilipinas dahil nag-iwasan sa atin ang malalakas na bagyo sa huling bahagi ng taon.
Iyon nga lang, dahil sa lumihis ang mga bagyo, kaunti ang naging pag-ulan at naging problema ang suplay ng tubig sa gripo ngayong 2020. At pagsapit nga ng Enero pa lang 2020, bumanat na ang Taal eruption na umabot sa Metro Manila at nagpahirap sa marami nating kababayan.
Mula noon, hindi na tumigil sa napakaraming sorpresa ang 2020.
May ilang manghuhula ang nagsasabi na may nakikita pa raw pangitain o may predikyon na may kalamidad pang posibleng mangyayari sa bansa bago tuluyang matapos ang 2020. Sana naman eh makontra anumang ang hindi magandang pangitain na nakikita nila.
Hindi pa natin alam ang resulta ng mga survey tungkol sa inaasahan ng mga kababayan natin sa magiging takbo ng buhay nila sa 2021. Pero noong 2019, 96 na porsiyento ng tinanong sa isang survey na nagsabing mataas ang “hope” o “pag-asa” nila na gaganda ang kanilang buhay sa 2020.
Maaaring marami sa 96 porsiyento na ito ang nabigo dahil nga ginawang perwisyo ng COVID pandemic. Pero may kasabihan mga tropapips na walang pupuntahan ang mga nasa itaas kung hindi ang bumababa; at kung nasa ibaba ka ngayon, aba'y wala ka nang pupuntahan kundi ang tumaas.
Iyon nga lang, kung dapa ka ngayon, nasa iyo na ‘yan at sa mga tao sa paligid mo kung papaano ka babangon, at tutulungang makabangon. Kaya tiis-tiis pa ng konti at matatapos din ang krisis.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
