Parang kabayo mga tropapips na tila nag-uunahan ang mga gumagawa ng bakuna na panlaban sa COVID-19. Bakit nga naman, aba'y kung sino ang unang makapaglalabas sa merkado ng ligtas na gamot laban sa virus, tiyak na tiba-tiba sa premyo, este kita.
Sa ngayon, mukhang ang “kabayo” na Pfizer ang umaarangkada at sumusunod sa kaniya ang Moderna. Ipinagmamalaki ng mga “hinete” o kompanyang nasa likod ng naturang mga gamot na 90 hanggang 95 porsiyento raw ang bisa nito laban sa coronavirus. Batay daw iyon sa isinagawa nilang eksperimento sa mga tao o clinical trial at walang malubhang side-effect o masamang epekto ang gamot.
Ilang araw matapos magpabida ang naturang dalawang “kabayo,” aba'y hindi rin nagpahuli ang pambato ng Russia na Sputnik V na nagsabing maganda rin daw ang resulta ng kanilang eksperimento na nasa phase III na.
Samantalang dalawang “kabayo” [ang isa ay sa Johnson & Johnson] ang mistulang nalaglagan ng hinete dahil natigil ang pag-arangkada sa pag-aaral sa kani-kanilang gamot nang nagkaroon ng daw ng hindi magandang epekto ang bakuna sa mga taong tinurukan nila.
Kung papalarin mga tropapips ang Pfizer at maaprubahan na sila ng Amerika para gamitin na, aba'y mangyayari ang turukan sa mga Amerikano sa Disyembre. At kung tagumpay talaga ang gamot, suwerte nila at makababalik na agad sila sa normal at magiging happy ang kanilang Pasko.
Pero kung may palpak, naku po! wag naman sana!
Eh papaano naman tayo sa Pilipinas? Ang sabi ng mga opisyal natin, baka sa susunod na taon ba tayo maambunan ng pampaturok kontra COVID. Kailan sa susunod na taon? Posible raw sa Abril.
Itataon kaya ng gobyerno ang pagbabakuna sa Semana Santa na “Linggo ng Pagkabuhay” para maging dramatic na muling pagkabuhay din ng mga Pinoy sa pandemiya?
Kung ang kurimaw natin na kating-kati nang mamasyal ang tatanungin, hiling niya na huwag naman sanang patagalin pa sa Abril kung mabisa naman talaga ang bakuna at kung may pondo nang nakalaan.
Kamakailan nga lang, kumambiyo na si President Mayor Digong Duterte at payag na siyang mag-advance payment sa bakuna kung mayroon na; kahit pa sa American pharmaceutical companies na Pfizer at Moderna na dating inayawan niya dahil puro kita o pera lang daw ang gusto.
Subalit kung totoo na mabisa at ligtas din naman ang Sputnik V ng Russia, baka mas maagang mababakunahan ang mga Pinoy. Pero ang tanong, handa ka bang maturukan ng Sputnik V o mas pipiliin mo ang Pfizer at Moderna ng Amerika?
Sa survey mga tropapips ng Social Weather Station noong Setyembre, sinasabing na 66 porsiyento ng mga Pinoy ang handang magpabakuha ng panlaban sa COVID-19 kung mayroon na. Duda naman na magpabakuna ang 31 porsiyente ng mga tinanong.
Ang kaso, mga adult na 18-anyos pataas ang tinanong at hindi kasama sa tanong kung payag silang pabakunahan din ang kanilang mga mas batang kamag-anak.
Pero lumilitaw na mas tiwala ang mga tinanong sa bakuna kontra COVID-19 kasya sa bakunang Dengvaxia na kontra-dengue.
Lumabas din kasi sa survey na 62 porsiyento ng mga tinanong ang tutol na ibenta pa sa Pilipinas ang Dengvaxia.
Understandable naman siguro mga tropapips kung marami ang ayaw sa dengvaxia dahil sa mga lumabas na noon na ulat mayroon daw itong masamang epekto sa mga hindi pa nagkaka-dengue. Habang ang bakuna kontra-COVID, aba'y hindi pa naman talaga nasisimulan “lubos” na nasusubukan dahil wala pang malawakang turukan.
Siguro eh tama lang na mauna na ang Amerika kung ready na ang Pfizer at Moderna. At tayo naman dito sa Pilipinas, ika eh, let's wait and see sa resulta.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
