Sa darating na Nobyembre 2, ipinagmalaki ng Toll Regulatory Board na handang-handa na raw ang mga toll operators sa lahat ng expressway sa “cashless” transaction dahil sa electronic toll collection system na ang iiral na tinatawag na RFID o radio-frequency identification. Pero ang maraming motorista, hindi yata naniniwala.
Marami kasi tayong katropapips ang bumulong ng kanilang mga reklamo na halos pare-pareho. At nang mabasa natin ang ilang post sa Facebook ng Department of Transportation (DOTr) tungkol sa RFID, aba'y namumutakti rin ng mga reklamo at tanong sa post.
Nababasa kaya o ipinapaalam kaya ng mga namamahala ng FB account ng DOTr kay Sec. Arthur Tugade ang mga reaksiyon ng netizens (na tiyak eh mga motorista) tungkol sa mga problemang isinusumbong nila tungkol sa silbi ng RFID?
Para sa mga tropapips natin na hindi pamilyar sa RFID, ito yung tila sticker na ikinakabit sa harapan ng sasakyan (sa headlight o windshield) na dumadaan sa mga expressway tulad ng NLEX, SLEX, at iba pang may “ex.”
Sa halip na titigil ang driver ng sasakyan sa toll booth para magbayad, ang sticker na lang ang babasahin ng “camera” o sensor para umangat ang harang at makakadaan na ang sasakyan.
Kung tutuusin, maganda ang RFID…kung mahusay ang sistema. Ang kaso, batay sa mga ibinulong sa atin na mga reklamo at nabasa rin sa mga reaksiyon sa post ng DOTr, maraming kapalpakan sa RFID na dapat ayusin. Lalo pa't dalawang klase ang RFID ng kompanyang namamahala sa mga expressway–ang “Autosweep” sa SLEX, STAR, Skyway System, NAIA Expressway, at TPLEX, at ang “Easytrip” sa NLEX, SCTEX, CAVITEX, C5 Link at CALAX.
Ang una nilang tanong, babasahin na ba sa toll gate na pang-Easytrip ang mga sticker ng Autosweep? At ganoon din ba ang mangyayari sa sticker ng Autosweep kung dadaan ang sasakyan sa toll gate ng Easytrip?
Dahil kung hindi, ibig daw bang sabihin eh kailangang magpakabit ng Autosweep sticker at Easytrip ang mga motorista? At kung dalawang sticker ang ikakabit nila sa sasakyan, hindi kaya mahilo na parang kuwago ang computer sa pagbasa sa sticker?
Sa totoo lang, wala pa tayong nababasang ulat mga tropapips na nagsasabing “fully interoperability” na ang mga toll gate para sa dalawang RFID. Ibig sabihin, wala pang linaw kung talagang kaya nang basahin sa magkabilang toll gate ang dalawang uri ng RFID.
May nabasa tayong artikulo na nagsasabing puwedeng mabasa sa toll gate ng Easytrip ang mga sasakyan na may Autosweep pero kailangan daw mag-apply para “interconnectivity.” Ibig sabihin, hussle.
But wait there's more. Habang hindi pa malinaw ang isyu ng “interoperability” ng dalawang klase ng RFID, aba'y pagkarami-raming ring reklamo at mababasa rin sa comment section sa FB post sa DOTr tungkol sa mga “nawawala o kinakain” na load para sa kanilang RFID.
Gaya ng isa pang palpak na Beepcard mga tropapips, kailangan mo ring lagyan ng LOAD ang isang RFID sa pamamagitan ng “card” na ibibigay sa iyo. Ang problema, nagtataka ang ibang motorista kung bakit ang laki ng nakakaltas sa kanila. Mabuti kung regular nilang nache check ang load..
May nagtatanong din kung may expiration ba ang load? Kasi nga naman, kung nag-load ka ng P500 at minsan ka lang dumaan sa expressway, aba'y matutulog ang pera mo sa card. Mantaking nyo mga tropapips kung gaano karaming motorista ang dumadaan sa mga expressway, aba'y tiba-tiba ang mga nakaisip ng “cashless” system na yan.
May mga reklamo rin na hindi kaagad nababasa ng computer ang sticker kaya naabala rin ang motorista at nagiging dahilan ng pagkakaipon ng mga sasakyan. Hindi daw ba dapat libre ang motorista kapag ang computer ang pumalpak dahil sa sablay na serbisyo?
Pero ang malaking tanong ng marami, pinag-aralan daw ba at pinaghandaan ang plano, o bigla lang naisip para samantalahin ang pagkakataon ng pandemic at nang magkaroon ng dahilan para obligahin ang mga motorista na magpa-RFID?
Habang marami ang nalilito at marami ang tanong, hindi kaya dapat kumilos ang DOTr sa isyung ito ng RFID para hindi naman magkandarapa ang mga motorista dahil sa “panakot” na “deadline”? O baka naman kailangan pang magalit naman si President Mayor Digong Duterte? Abangan.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
