Dahil sa banta ng coronavirus disease 2019 o Covid-19 sa bayan ng Romblon, sinuspende ni Governor Jose Riano nitong Linggo ang pasok sa mga pampubliko at pribadong paaralan sa bayan sa darating na Lunes at Martes, November 9 hanggang 10.
Sa memorandum order na ibinaba ng Gobernador, sinabi rito na ang pagsuspendido ng pasok sa paaralan ay para mas mapabilis ang ginagawang contact tracing ng lokal na pamahalaan ng Romblon sa mga nakasalamuha ng ika-35 pasyente sa Romblon na nagkaroon ng virus.
Maliban sa pagsuspende ng klase, ipinagutos rin ng Gobernador ang pagkakaroon ng work from home arrangement sa lahat ng empleyado ng Provincial Government, Municipal Government, National Government Agencies, at Department of Education, na nakabase sa bayan.
Magkakaroon lamang ng skeletal workforce para sa mga ahensya na kailangang maghatid ng basic services.
