Tuluyan ng naging bagyo nitong hapon ng Martes, October 13, ang low-pressure area (LPA) na binabantayan malapit sa Guiuan, Eastern Samar at pinangalang bagyong Ofel.
Ayon sa Philippine Atmospheric, Geophysical, and Astronomical Services Administration (Pagasa), ang bagyong Ofel ay inaasahang magla-land fall bukas ng umaga sa bahagi ng Eastern Samar o sa Northern Samar at gagalaw patungong northwestward o west-northwestward sa bilis na 15 km/h.
Inaasahang dadaanan nito ang southern portion ng Southern Luzon bukas.
Taglay ng bagyong Ofel ang lakas ng hangin na aabot sa 45 km/h malapit sa gitna at bugsong aabot sa 55 km/h.
Nakataas na ang Tropical Cyclone Wind Signal no. 1 sa mga probinsya ng Sorsogon, Northern Samar, Northern Portion ng Eastern Samar (Borongan City, San Julian, Sulat, Taft, Can-Avid, Dolores, Maslog, Oras, San Policarpo, Arteche, Jipapad) at northern portion of Samar (Pinabacdao, Villareal, Talalora, Daram, Zumarraga, Calbiga, Hinabangan, Paranas, San Sebastian, Motiong, Jiabong, Catbalogan City, San Jorge, San Jose de Buan, Matuguinao, Tarangnan, Gandara, Pagsanghan, Santa Margarita, Calbayog City, Santo Nino, Almagro, Tagapul-An).
Makakaranas ang mga nabanggit na lugar ng hangin mula 30-60 km/h o intermittent rains sa loob ng 36 oras.
