Dahil sa bangayan [na naman] ngayon sa liderato ng Kamara de Representantes, may mga katropapips tayo na nagkakatuwaang “magpustahan” kung kakapit o bibitiw sa kanilang puwesto si Speaker Alan Peter Cayetano sa Oktubre.
Pero bago ‘yan, may tropapips din tayong nagtanong kung mayroon daw bang batas sa Pilipinas na “anti-dognapping?” Natanong niya ito dahil sa kakilala niyang nawalan ng aso dahil sadyang kinuha raw ng lalaking nakamotorsiklo sa Las Pinas.
Hindi raw masasabing nagmalasakit ang rider sa aso na isang lalaking shih tsu kaya niya dinampot. Nakalabas daw kasi sa gate ng bahay ang aso na kulay brown at tumakbo sa kalye.
Sinundan naman daw ito ng binatilyong kapatid ng may-ari ng aso para kunin at iuwi pero dinampot na nga ng rider at humarurot ng alis. Sa kabila ng panawagan ng may-ari ng aso sa social media, hindi pa rin naibabalik ang kanilang mahal na alaga na mahigit tatlong taon na nilang inaalagaan.
Kadalasan kasi, kasong thief lang o pagnanakaw ang ikinakaso sa mga taong nangunguha ng aso at ibinebenta. Pero paliwanag ng ating katropa, miyembro ng pamilya ang turing na ng marami sa kanilang pet dog kaya masakit sa kanila kapag nawala ito, lalo na kung ninakaw.
Kaya payo ng katropa natin, sana raw ay magkaroon ng malinaw na batas na bawal ang kumuha ng kahit anumang alaga, lalo na ang aso o pusa, at patawan ng mas mabigat na parusa ang mga mahuhuling gagawa nito. Na kapag may napulot na aso, dapat i-report kaagad sa pulisya at hindi basta iuuwi lang sa kanilang bahay.
Para sa tropapips natin, hindi sapat ang simpleng kaso ng pagnanakaw dahil hindi nga naman simpleng “bagay” ang kinulimbat ng kawatan. Katwiran niya, may buhay at emosyon na puhunan ang mga tao sa kanilang mga alaga.
Samantala, hindi naman pera kung hindi pitik sa tenga ang pustahan ng mga katropa natin kung tutupad o hindi si Cayetano sa kanilang kasunduan ni Marinduque Rep. Lord Alan Velasco, na maghahati sila ng termino bilang Speaker sa Kamara.
Sa kasunduan, unang uupo si Cayetano at dapat siyang bumaba sa puwesto sa Oktubre. Pero ilang linggo na lang patungo sa Oktubre, nagkakaroon ng bangayan sa Kamara tungkol sa alokasyon ng infra projects ng mga kongresista sa 2021 budget.
Kahit sa 2022 pa mga tropapips ang halalan, ang 2021 ang itinuturing na “election budget” na mahalaga sa mga kongresistang tatakbo sa naturang halalan–sa kapareho man posisyon o kaya naman eh mayor, vice mayor, governor o vice governor.
Kung maliit kasi ang makukuhang pondo ni congressman sa 2021, aba'y baka wala siyang maipagyayabang na project sa kanilang lugar pagdating ng halalan sa 2022. Ang ibang kongresista na planong tumakbong gobernador, pinapalakihan ang kanilang pondo para sa infra project kahit sa buong probinsiya at hindi lang basta sa kanilang distrito.
Kaya naman ang mga alipores nina Cayetano at Velasco, kaniya-kayang bangayan ngayon para palitawin kung sino ang hindi patas sa pagkakaloob ng infra projects na kung minsan ay tinatawag din na “pork barrel” funds.
Kung maipapakita nga naman ng tropa ni Velasco sa kanilang mga kapwa mambabatas na hindi patas at may paboritismo si Cayetano sa paglalagay ng pondo, aba'y maipipilit makakakuha sila ng suporta na dapat matuloy ang term-sharing agreement sa Oktubre, ang buwan na target ng tropa ni Cayetano na ipasa ang 2021 budget.
Kung naging mautak si Cayetano at nagawa niyang gawing “happy” ang mayorya ng mga kongresista, puwedeng may mga mambabatas na manawagan na huwag nang ituloy ang term sharing at “status quo” na lang ang lahat para sa unity ng administrasyon. O kaya naman eh may hihirit ng eleksiyon sa mga pinuno para ihalal muli si Cayetano.
Pero kung magiging gentleman at tunay na lalakeng kausap si Cayetano, katulad ng sinasabi ni Velasco, as in may isang salita na susundin ang kasunduan nila, hindi na kailangan magbangayan at maghamunan ng suntukan ang mga mambabatas. Abay ngayon pa lang nagsulputan na mga tuta ni Cayetano at nakakahiya na mismong taga-Liberal Party(LP) na sinasabing oposisyon kuno sa katauhan ni Caloocan Cong. Egay Erice ang pinakamalakas kumahol!
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
