Matapos ang mahigit sa dalawang linggo at ang iba eh inabot pa ng mahigit isang buwan na mistulang “pagkakakulong” sa mga quarantine facility, nagsimula nang pauwiin mga tropapips sa kani-kanilang mga lalawigan ang libu-libong OFWs na nagbalikan sa Pilipinas dahil sa epekto sa mundo ng COVID-19 crisis.
Kung hindi pa siguro naglabasan sa media ang hinanakit ng maraming OFWs na buryong na buryong na sa mga quarantine facility, aba’y baka hindi pa nalaman ng Malacanang ang pinagdadaanang hirap at lungkot ng mga kababayan nating tinatawag na bagong bayani. Kung may sapat man na pondo ang pamahalaan natin na panggastos ngayon at kung bakit naging matatag ang reserba nating dolyares, aba’y isa sa mga dahilan niya ang dollar remittances na ipinadadala nila.
Alam ba niyo na bago tayo lumpuhin ng COVID-19 nitong Marso eh umabot pa sa $5.566 bilyon ang personal remittances ng mga Pinoy na nasa abroad mula Enero hanggang Pebrero. At mas mataas ‘yan sa $5.302 bilyon kumpara sa kaparehong parehong noong 2019, ayon sa datos na inilabas kamakailan ng Bangko Sentral ng Pilipinas (BSP).
Hindi lang ‘yon, ang cash remittances naman na dumaan sa mga bangko, umabot sa $5 bilyon. Kaya naman siguro kung anuman ang ginagastos ngayon ng pamahalaan sa pagpapauwi at pagkuha sa kanilang tinuluyang bilang quarantine facility, aba’y siguro naman eh kayang-kayang gastusan mula sa mga ipinadala nilang remittances.
Pero hindi lang dapat sa gastos sa pagpapauwi at tinuluyan nila ang binuhusan ng pondo para sa mga OFW— dapat pati ang gastos sa kanilang COVID-19 tests. Sa protocol, dapat sanang 14 days lang ang kanilang quarantine, ngunit ang nangyari, may inabot na ng mahigit isang buwan.
May mga buntis pa ngang OFW na sa mga quarantine facility na inabot ng panganganak dahil sa paghihintay ng resulta ng kanilang COVID-19 tests. Ang ibang OFWs, gaya ng mga seafarer, ilang linggo na munang natengga sa mga barko nila sa laot bago pinayagang makadaong. At pagdating nila sa lupa, panibagong quarantine na naman, at kung mamalasin sa pag-uwi nila sa kani-kanilang lalawigan eh baka ipa-quarantine uli sila.
Kung hindi pa nga umabot sa Palasyo ang hinaing ng mga OFWs sa tagal na lumabas ang resulta ng kanilang COVID-19 tests, aba’y baka hindi pa nalaman ni President Mayor Digong Duterte ang kanilang sitwasyon. Kaya ang utos niya, ilabas na ang mga resulta at pauwiin sa loob ng isang linggo ang tinatayang 24,000 OFWs na nakatengga sa Metro Manila.
Tulad ng ibang problema at kapalpakang lumalabas sa pagharap ng bansa sa COVID-19, siyempre may turuan pero walang aminan. Ang mahalaga, tapusin ang dapat tapusin sa mga OFWs, unahin ang dapat unahin tulad ng iba pang mga buntis na OFWs na nasa quarantine facilities. Aba’y kung totoo kasi na tinatayang mayroon pang 30,000 hanggang 40,000 OFWs at Pinoy na galing sa abroad ang mag-uuwian at ika-quarantine, dapat lang na makauwi na ang 24,000 na nandito para mayroon namang tutuluyan ang mga paparating.
At siguro naman, alam na ng mga kinauukulan ang dapat nilang gawin para hindi na maulit ang “pagkakakulong” ng mga darating na bagong OFWs.
Samantala mga tropapips, nagpayo ang ilang nating kurimaw na banas sa mataas na billing ng kuryente na huwag daw masyadong umasa na bababa nang bongga ang May “shocking” billing kahit maglalabas umano ng panibagong billing ang Meralco sa June.
Imposible raw kasi na ibaba ng Meralco nang husto ang billing sa Mayo dahil kapag nangyari ito eh lalabas na talagang nagkaroon sila ng pagkakamali sa una nilang ginawa na hula-hula with “full ECQ-impact” kuno. Kung may mabawas man sa May billing, malamang daw eh kapiranggot lang at dahil ito sa sinusping environmental charge na iniutos ng Energy Regulatory Commission. Kung tama ang ating mga kurimaw, abangan.
Tandaan: Ang tao'y nilalang na politiko at madalas ang politiko'y nanlilinlang ng tao! (Twitter: follow@dspyrey)
