Nanumpa na kamakailan bilang mga professional teachers ang aabot sa 96 na bagong guro na nakapasa sa September 2019 Licensure Examination for Teachers na ibinigay ng Professional Regulations Commission (PRC) at ng Board for Professional Teachers (BPT).
Ang pormal na panunumpa ay pinangunahan mismo ni Dr. Reynaldo D. Agcaoili ng Professional Regulations Commission (PRC) – Lucena kasama sina Lea N. Francia, Ringo D. Daguison at Noreen M. Albrando.
Sa talumpati ni Dr. Agcaoili, hinimok nito ang mga bagong guro ng bansa na gampanan ng mabuti ang kanilang mga bagong tungkulin at nawa’y maging katulong ng gobyerno sa pagbibigay ng tamang impormasyon sa mga bata.
Ang mga nanumpa ay ilan lang sa 459 na kabuuang bilang na nagtapos sa Romblon State University na nakapasa sa nasabing pagsusulit.
Makailang beses na rin nagsagawa ng oath taking ceremony sa probinsya ng Romblon ang PRC-Lucena at madalas itong ginaganap noon sa bayan ng Odiongan, ngunit ngayon ay idinaos ito sa Romblon Public Theater sa Romblon, Romblon.
Dumalo rin sa oath taking ceremony sina Romblon Mayor Gard Montojo, SDS Dr. Malou Servando, Prov’l Administrator Atty. Lizette Mortel at Chief of Staff Ronald Geronimo.