Buhay na buhay parin ang kultura ng mga Pinoy pagdating sa magandang pakikitungo sa kapwa, sa kabila ito ng banta ng novel coronavirus sa bansa. Napatunayan yan ng apat na turistang Chinese na bumisita sa Romblon kamakailan para sana mamasyal ngunit nauwi sa pagka-quarantine nila sa San Andres Municipal Hospital dahil sa kumakalat na sakit.
Pag-alis ng apat na Chinese, nag-iwan sila ng isang liham para sa mga taga-Romblon kung saan bumungad ang paghingi nila ng paumanhin dahil sa di umano'y problemang idinulot nila sa probinsya.
“Please allow be say sorry to all of you, for bringing you so much trouble and panic. It's our fault to travel at this special occasion just during the period of disease. Please just forgive us. (Mangyaring hayaan niyo kaming humingi ng pasensya sa inyong lahat, sa pagdadala sa inyo ng napakaraming problema at takot. Kasalanan namin na maglakbay sa ganitong panahon lalo na sa panahon nitong sakit. Patawarin niyo lang kami.)” ayon sa liham ng isa sa apat na Chinese national.
Matatandaang dumating ang apat sa Pilipinas noong January 27 mula Hubei Province, China at dumiretso ng Lucena, Quezon bago sumakay ng RORO patungong Marinduque at Romblon.
Maliban sa paghingi ng pasensya, nagpasalamat rin ang apat na Chinese sa mga nag asikaso sa kanila magmula ng dumating sila sa Romblon hanggang sa dalhin sila sa San Andres Municipal Hospital kung saan sila na-quarantine ng tatlong araw.
Hindi umano nila inaasahang sila ay makakaranas ng kabutihan ng mga taga-Romblon kahit sila ay isolated sa loob ng ospital.
“Another thing, we four have never dreamed of been treted so kindly when we were been isolated. Food, drinks, meals, clothes, other daily goods [were delivered]. (Isa pang bagay, kaming apat ay hindi kailanman pinangarap na makakaranas kami ng kabaitan nang kami ay isolated. Pagkain, inumin, pagkain, damit, iba pang pang-araw-araw na gamit ang inihatid.)” ayon pa sa liham.
Bago matapos ang liham, pinuri pa nila ang ganda ng lalawigan magmula sa mga dagat, at mga tanawin, hanggang sa kabaitan ng mga residente rito.
Samantala, tinanggap naman ng ilang binanggit sa liham ang paghingi ng paumanhin ng apat ng Chinese nationals. Ayon nga sa may-ari ng isa sa mga resort na tinuluyan ng apat, handa umano niyang tanggapin silang muli kung sakaling bumalik sila sa Romblon pagkatapos ng problema sa 2019-nCoV-ARD.
Kahit ang mga staff ng San Andres Municipal Hospital, Provincial Health Office, at ng Department of Health – Romblon, ay ikinatuwa rin ang iniwang sulat ng apat na Chinese.
Nakaalis na sila noong ika-4 ng Pebrero patungong Manila kung saan nila ipagpapatuloy ang natitira nilang araw para sila ay mag self-quarantine.
Ayon kay Dra. Ederlina Aguirre, Provincial Health Officer, hanggang sa umalis ang apat sa Romblon Airport ay hindi umano sila nakitaan ng anumang sintomas ng 2019-nCoV-ARD.
