Ang pinagsanib na pwersa ng Bureau of Jail Management and Penology (BJMP), at Philippine Drug Enforcement Agency – Romblon, Odiongan Municipal Police Station, BFP-Odiongan Fire Station, Philippine Coast Guard, at Army, ay nagsagawa ng biglaang paghahalughog sa mga selda ng PDLs (persons deprived of liberty) sa Odiongan District Jail nitong Martes ng hapon, January 28.
Bandang alas-4:30 ng hapon ng magsimula ang operasyon na tinawag nilang ‘Oplan Greyhound'.
Ayon sa kay Jail Senior Inspector Danilo Daban Abuda, Jail Warden ng Odiongan District Jail, wala naman umanong nakuhang mga ipinagbabawal na gamit sa loob ng mga selda matapos ang operasyon.
Ang pagsasagawa ng pinaigting na Oplan Greyhound ay programa ng BJMP para maalis ang presensya ng iligal na droga sa loob ng mga bilangguan.
Dagdag pa ni Abuda, mahigpit ang kanilang pagbabantay sa mga bisita ng mga PDL para umano maiwasang maipuslit ang mga ipinagbabawal na bagay sa piitan kagaya ng patalim, shabu, cellphone at iba pa.
Matapos ang operasyon, binigyan ng mga tauhan ng Philippine Drug Enforcement Agency – Romblon ang mga PDLs ng mga babasahin kung saan mababasa ang masamang epekto ng paggamit ng mga ipinagbabawal na gamot.
